向男同事勇敢示愛 被對方唱通街傷害

我鍾意咗個男同事,工作以外都有兩句嘅,有時會互send msg講下無聊嘢,食lunch就通常一大班人,冇乜機會獨處,咁樣嘅日子已經維持咗一段時間,本來只係想順其自然,但係呢個男仔突然辭職轉工,我擔心之後再見唔到佢,所以就決定表白。

由於佢當時仲有唔夠一個月就走,我用farewell呢個理由約佢放工食飯,諗住兩個人方便傾計。

嗰晚食完飯行去搭車嘅時候,我鼓起勇氣問佢:「有冇諗過大家可以一齊?」佢最初以為我講笑,但我強調係認真,跟住佢就收起咗笑容,話一直以嚟只係當我同事,完全冇諗過拍拖,又話我唔係佢鍾意嘅類型,個答案係傷心嘅,但都冇辦法啦,起碼知道自己衰咗,以後唔使咁多幻想。

諗住件事就咁完,頂盡大家尷尬埋最後呢個月啫,反正佢都就快離開公司,點知個男仔講咗畀好多同事聽,而家諗返轉頭,相信喺我示愛當晚,佢已經同咗其他人講,只係我完全唔為意,大約過咗幾日之後,有另一個比較熟嘅女同事問我:「你係咪追阿Ted?佢哋猛咁傳喎!」

當時真係唔識畀反應,一來覺得好瘀,佢講嘅係事實,我好想搵窿捐,二來冇諗過阿Ted會講出去。

跟住嘅日子唔知係咪自己疑心生暗鬼,硬係覺得好多同事望住我細聲講大聲笑,啲眼光好奇怪,嗰種感覺好唔舒服。

喺示愛衰咗當晚,我打咗一大段嘢send畀阿Ted,內容大致係講自己鍾意咗佢好耐,雖然冇機會一齊,但都會祝福佢新工作順利,同時祝佢快啲搵到女朋友之類,我覺得都係好普通嘅內容啫,冇諗過原來阿Ted將呢段Whatsapp message cap圖,周圍send畀其他人睇,呢單嘢傳下傳下直情傳到我手上,因為有個別女同事forward返畀我,佢哋覺得阿Ted唱緊我。

由驚變成好嬲,純粹示愛啫,女仔行出呢步已經要好大勇氣,就算你唔鍾意我,甚至當我係豬扒,大家都係一場同事,我又完全冇惡意,點解要周圍唱呢?結果我直接搵阿Ted講:「你使唔使咁呀?而家全公司都知!」

阿Ted話佢都唔知出面同事唱緊,佢只係同一個男同事講,只係畀咗一個男同事睇,總之佢就將全部責任推晒出去,當時佢仲有幾日已經last day,我知道大吵大鬧都冇意思,只會更加丟架。

有幾個比較熟嘅女同事話我知,好多同事直至而家呢一刻仲攞緊我示愛單嘢開玩笑,例如有人著得企理啲返工,就會有同事講:「你唔好咁靚仔啦,一陣Crystal向你示愛呀!」又或者有人拎文件畀我,會有同事話:「你擺落個TRAY好喇,唔好有眼神接觸,小心Crystal同你過電。」

我寧願唔知,因為聽完之後個心仲難受,我知道自己喺公司已經成為咗笑話,日日畀人拎出嚟食花生,阿Ted已經走咗,我就留低畀人笑,最近考慮緊好唔好辭職,因為心理壓力實在太大,成個人心情好down,精神好緊張。

投稿:Crystal

===

👀💗好多人話呢度食唔好喺呢度屙,不過同事日對夜對,有時發生感情真係好難避免。

《辦公室禁拍拖 求職者以為去咗全民造星》
https://hkofficedaily.com/?p=13506

error: