你信唔信每間office都有鬼存在？有次OT嗰陣，我講起屋企隻狗半夜猛咁吠：「平時唔會咁㗎！全屋人醒晒。」
女同事：「有賊呀？」
我：「公屋30幾樓有咩賊吖，佢對住廚房狂吠，又真係有啲聲，我想行入廚房睇，隻狗又係咁撲埋嚟，好似驚我有危險咁。」
女同事：「喂呀，唔好講喇！」
我：「都冇事，入到去咩都冇，見隻狗咁驚咪畀佢入房瞓囉。」
Joe：「可能隻狗見到啲你見唔到嘅嘢，其實都係想保護你哋一家人。」
我：「你好似有啲經驗咁喎，唔通有鬼故分享？」
Joe：「我自細有陰陽眼，不過一時時……」
連我阿姐都插嘴：「唔好再講喇吓。」
幾個女同事依嘩鬼叫，又話要一齊走，結果我哋成班執嘢離開，直至第二日食lunch，其中一位女同事終於忍唔住問：「Joe，你話有陰陽眼，真定假？」
Joe：「我有時都覺得唔係真，因為見到嘢嘅地方都好唔正常。」
我：「例如呢？」
女同事：「係咪好似套《見鬼》咁樣瀨叉燒？」
Joe：「燒臘舖係多嘅，你唔覺拜山拜乜都要買燒肉咩？之前老豆有個friend搬新屋，佢拎完鎖匙夜得滯，買唔到生豬肉，諗住反正都係拜，買燒肉應該ok啦，但其實用燒肉拜四角， 會令到寄居嘅靈體覺得好食好住唔肯走，卒之發生好多怪事，我同老豆後來上佢屋企睇，嘩，一屋都係嗰啲嘢。」
阿姐：「仲有咩地方見到。」
Joe：「其實唔定㗎！唔係好似拍戲咁夜晚先出沒，我同女友去主題公園都見過，人哋一家大細影合照，有隻冇腳嘅痴埋去，有冇影到就唔知喇，我仲見過坐喺巴士頂，手腳齊全同普通人外型冇分別，但架巴士行緊㗎喎，正常人冇可能坐到巴士頂仲要咁定，嗰個一定唔係人。」
女同事：「好喇好喇，到此為止。」
我：「其實我哋公司有冇？」
Joe：「唔好問啦！」
阿姐：「即係有？」
Joe：「一時時，平時唔覺，可能多人，始終夠人氣，噚晚就……不過佢哋應該冇惡意。」
女同事：「公司地方點會有呢啲呀？」
Joe：「唔知㗎，唔知好過知啦，或者我哋公司幢大廈有人跳過樓呢。」
大家聽完都一陣沉默，我求知慾最強，下晝趁煙break走去問樓下保安，想知呢幢大廈有冇發生過命案，原來喺7至8年前，有人上過大廈天台跳樓，西裝友嚟嘅，當場不治，Search返新聞，當時話係因為財困。
我食完煙返上去同佢哋講，個個都好不安，自此之後大家搭正6點鬆人，有咩最多拎返屋企做，最盡唔會留超過6:45，留都一定叫人等埋。
有時同阿Joe講嘢，佢會望住我後面嘅方向碌大隻眼，搞到我都好驚，但阿Joe次次都叫我唔好郁，正常繼續傾計就得喇，佢有時同阿姐講嘢都係咁，教我哋盡量平靜，兩個世界河水不犯井水。
後來阿Joe轉咗工，冇人提點，不過大家都會醒目，唔會留得太夜。
某日我喺屋企個廚房又聽到怪聲，好輕微，我想望真啲，又想行返出去，然後發現有一條四腳蛇，好大隻，我同佢四目交投咗一秒，隻四腳蛇一支箭咁捐返去廚櫃後面。
唔知點解第一時間諗起阿Joe，我打畀佢話：「屌吖，頭先廚房又聽到怪聲，原來係四腳蛇，可能嗰晚都係，勁大隻勁肥，恐佈過見鬼。」
Joe：「邊有咁多鬼吖。」
我：「咁又係，我冇陰陽眼，有都見唔到啦，點呀，新公司有冇嗰啲嘢。」
Joe：「其實我冇陰陽眼，吹水㗎咋！」
我：「安慰我呀？內疚咪返嚟做囉，個個都掛住你呀。」
Joe：「嗰陣日日OT，我條女詐晒型，佢脾氣好臭㗎，見你講開屋企有怪聲，我咪鳩up下囉，你唔覺阿姐好淆底咩？後來唔使OT啦！」
我：「食屎啦，公司幢大廈以前真係有人自殺，咁點解釋呀！」
Joe：「屌，香港有邊幢大廈冇死過人㗎！即係我哋細細個聽鬼故，無論你住喺邊，梗有人話呢度以前係亂葬崗，你冇聽過咩？我真係唔想OT㗎咋！」
我：「你個仆街仔吖！」
Joe：「咩仆街啫，你咪同阿姐澄清囉，以後晚晚OT唔好掛住我。」
鬼，我相信係有嘅，就等於每間office都梗有幾個屎忽鬼一樣，至於真嘅鬼，只要唔做虧心事，的確冇咩需要驚。
我冇同阿姐講陰陽眼單嘢係老作，唔使OT對大家都係一件好事嚟嘅。
投稿讀者：Mr.Ha