明明係Resign 離職證明變咗被解僱

投稿讀者:Ariel

我喺呢間公司做咗3年,本來好地地,但係上年空降咗一位新嘅主管,同事嘅噩夢從此開始。呢位新主管已經先後迫走咗兩位同事,佢份人好陰濕,不斷用冷暴力方式搞到你無癮,一直捉你錯處,又會喺好多人嘅時候講啲令你難堪嘅說話,十足十電視劇嗰啲奸角小人一樣,絕對冇誇張。

被迫走嗰兩位同事比較腍善,我本身脾氣就剛烈啲,所以同佢由頭撐到尾,基本上日日都會吵一鑊咁滯,雖然我表面上可以handle呢啲所謂辦公室政治同埋角力,但係好老實講,心情的確受到好大影響,連老公都話我脾氣差咗,情緒好波動,將公司啲煩惱同埋唔開心帶咗返屋企,所以提議我休息下先,反正冇急切嘅經濟壓力,不如等疫情過後先搵新工。

被公事影響家庭係最唔抵,所以同個陰濕上司嘈多幾次之後,我都係決定辭職唔撈,唔想日日返工同人開戰,心態好唔舒服。交咗信之後,個陰濕上司勸我扣埋啲大假提早走,我梗係唔制啦,一來啲大假點解要蝕畀你?二來今年耐唔耐都home office,有時唔使見到,麻煩你將啲大假變返錢畀我添呀,捐出去都唔會益你。

拒絕扣假提早走呢件事搞到佢好唔順氣,但估唔到條友成個小學雞咁玩嘢,離職後約兩個星期,我收到公司寄嚟嘅reference letter,裡面竟然打咗我係被解僱,你咁樣好影響我第日搵新工㗎喎!所以即刻打返去人事部問清楚,HR話封reference letter係我上司親自打,垃圾!你身為HR,當日有份收我封辭職信,唔係應該把關㗎咩?我上司話我係被解僱就係被解僱?咁仲要你班人事部把托呀!

我再打去質問嗰位陰濕上司,佢仲好笑,話一早想炒我,唔覺得咁樣打落封信有咩問題,哦!你想隻手遮天,咁咪玩大啲囉!我同佢講,當日封辭職信,我唔止email畀佢同埋人事部,仲有BCC自己email(我都係之前睇過你嘅post,先突然醒起要BCC自己!),估唔到呢招真係用得著,更加估唔到佢會喺reference letter老屈我被炒。

我同個陰濕上司講:「無所謂呀!你可以話我係被炒,咁就麻煩賠返一個月代通知金,因為我畀你炒的話,冇可能冇錢賠㗎嘛!不過想同你講聲,我有email copy,有晒證據,你想點做由你決定,但如果我係被解僱,就算打官司都要追返你欠我嘅代通知金。」

嗰條陰濕佬聽完之後淆晒底,一係你就驚動老細同管理層,額外賠一筆錢畀我,一係就認低威再出過封reference letter。收咗線唔夠一個鐘,人事部已經打嚟話會出返封正確嘅reference letter,聽日即刻搵速遞寄嚟,我忍唔住又爆咗HR一鑊:「再打錯就勞工處或者法庭見㗎喇!使唔使我畀啲reference letter template你抄呀?」

自己遞信辭職都屈我被解僱,咁嘅時勢仲想人哋搵唔到工,仲想斷人衣食,做人做到咁賤格真係要落地獄!

error: