短短一個星期內，有4至5個人問我好唔好買匯豐？
「今日個市又升返喇，而家追遲唔遲呢？」
我估佢哋同一時間已經問咗好多人，即係好想買好想買，但又要搵個人喺言語同精神上鼓勵。
我對股市完全冇研究，淨係有少少印象之前恆生指數28000幾點（如記錯請見諒），早排有日loop fb見到一堆post愁雲慘霧，啱啱check下，而家就係23000幾點，跟住就陸續收到電話同WhatsApp問我買唔買匯豐好？
以前做記者最多誘惑，前面係馬經版，左手邊係財經版，每日都有好多number彈過嚟，除咗股票number，仲有一場8號，5場3號，尾場2號，附加一啲：馬房畀料、馬主今晚入場、信就買少少……但係我發現一個現象～～～好多人都係贏少少嗰陣大大聲，輸鑊金嗰陣唔出聲。
我成日都覺得，如果有人搵到包賺錢嘅formula，其實係唔會想同人分享，我就未見過李嘉誠開班教人做生意喇。
愈係成功嘅人，愈鍾意靜靜地贏。
有位舊同事個阿媽因為日日睇財經分析員推介，結果搞到成手蟹貨，佢有次嬲嬲地同阿媽講：「真正嘅股神得鬼閒教你買股票咩，喺屋企匿埋賺錢好過啦！」
記得有一年歐洲國家盃爆大冷，由希臘最終奪得冠軍，其實我係捷克球迷，當時有普波斯基、尼維特、貝加、路斯基……一句講晒，呢隊捷克係黃金一代，四強鬥希臘時被捧為大熱，我同細佬去咗一間24小時營業，江湖傳聞有精液炒飯嗰間茶餐廳睇波，隔離枱有個師奶同侍應講，自己買咗3000蚊捷克上盤。
「射啦！射啦！做咩唔射呀？」師奶聲如洪鐘，但其實嗰個moment，捷克隊連半場個中圈都未越過，喺自己後半場喎，點射呀？你老公射完，佢都未射啦！當時我已經意識到捷克今次仆街了，果然不出所料，愛隊四強爆冷被淘汰。
最近身邊幾個人都問我買唔買匯豐，唔知點解，我又聞到當年希臘爆冷捧盃嗰浸味。
其實買股票最好就係錢多到唔等住用，否則買少少而自己個心態又承受唔到高低起伏，好容易會出現一種情況－－－為咗執個菠蘿包而畀車撞L死。
我真係冇買開股票，而我呢3個朋友亦冇買股票嘅習慣，賺錢有好多方法，財不入急門，投資同投機係兩樣好唔同嘅事，當你接觸一樣唔擅長嘅嘢，要諗下自己賺錢有幾辛苦，要量力而為。
可能我講嘢好mean，不過出發點係為大家好，希望喺呢個非常時期，每個人嘅身體同埋荷包都可以安然無恙，全身而退，唔好為咗執個菠蘿包畀架幾噸重嘅大貨車撞死。