有個friend最近終於釋懷，仲話疫情過後想join我公司啲活動，梗好㗎！不過而家所有event取消晒，開返再通知佢啦！
我呢個朋友係男仔，一直忘記唔到個ex，其實當年佢兩個算郎才女貌，但係性格真係唔啱，雙方都好倔強，一樣咁臭脾氣，所以愛還愛，嗌交依然多過食飯，最後分手嘅原因都係一啲瑣碎事，致命傷係日積月累嘅磨擦。
兩個人分開之後，男嘅冇拍拖，女嘅就隔咗兩年再同另一個男仔一齊，後來仲結埋婚，個老公係做超市理貨員，Ar…忘記交代少少嘢，我個friend屋企有啲錢，佢自己都係做醫生，雖然唔係大國手，只係有間診所仔。
早排佢個ex身體有啲唔舒服，都係透過我呢個friend轉介去相熟嘅專科，然後佢兩個又多返少少聯繫。
我個friend一直以為個ex會後悔當年分手：「我唔會畀自己結婚後同老婆住劏房，唔會畀老婆大緊肚都迫巴士返工，我學歷高過佢老公好多，每個月搵嘅錢係佢老公唔知幾多倍，所以佢應該會後悔，後悔當年同我分手。」
不過，現實並唔係咁。
我個friend話，之前轉介專科時再傾返偈，佢知道對方老公係一個好細心嘅人，由拍拖到結婚都對佢個ex呵護備至，甚至呢次睇專科，都係由個老公提出，因為好擔心老婆會有事，雖然佢哋兩口子住劏房，加埋搵嘅錢又唔多，專科覆診千千聲落樓係一個幾大嘅負擔，不過佢兩個仍然一齊捱一齊面對。
我個friend仲add返個ex嘅fb，睇到佢哋平時嘅生活照，仲有雙方家人朋友合照嘅相，隔住個mon都覺得佢哋好開心同融洽。
然後我呢個朋友話：「當年分手真係有原因，如果勉強一齊，咁先至會後悔，我自己唔應該後悔，佢都完全唔需要後悔，大家嘅經歷同價值觀好唔同，性格不合，所以先會分開。」
佢個ex搵到一個適合自己嘅人，咁先係最幸福，就算我個friend喺佢身邊，都未必畀到呢個女仔想要嘅安全感同理想生活。有啲女仔想要嘅並唔係錢或者名牌手袋，而係精神上嘅滿足，關心對佢嚟講已經足夠㗎喇，我公司有個台灣女同事㗎，佢聽完我分享之後講咗一句，應該係唔少女仔嘅心聲～～～給得再多，不如懂我。