每次同人講：「其實我份人好內向。」
跟住都會換嚟以下回應：
食屎啦！收皮啦！收嗲啦！
冷靜啲先，呢個世界真係有我呢種咁奇怪嘅人。
身邊有幾個朋友都係party animal，逢show必到，佢哋攰到仆街都要出去飲嘢食飯，要從外來世界補充養份，反而一個人嘅時候就會提唔起勁。
我相反，只有喺獨處嘅時候，成個精神狀態先可以恢復，根據心理學分析，內向嘅人唔代表好靜或者不善辭令，係兩件事嚟。內向嘅人，都係靠獨處嚟補充精力同養份，從獨處當中得到滿足感同快樂，對呢種人嚟講，一個人喺屋企無所事事並唔算寂寞，置身於話不投機嘅人群當中先係真正嘅寂寞。
不過我留意到身邊嘅朋友、同事、讀者，並唔係因為我話自己內向先叫我食屎啦！收皮啦！收嗲啦！而係因為佢哋覺得我真係應該食屎啦！收皮啦！收嗲啦！同內唔內向無關，同我個格衰比較有關。