今日有人問我：「女友會唔會check你手機同摷你啲嘢？」
我答：「Never！」
我女友Kelly十分注重私隱，呢樣嘢同佢嘅成長背景有關，因為Kelly阿媽以前好鍾意摷佢啲櫃桶、書包、手袋，唔敲門就衝入佢間房，仲會拆晒佢啲信，無論係私人信件定係銀行信都唔放過。
其實Kelly表達過不滿好多好多次，佢阿媽竟然話：「一家人講咩私隱呀？你有啲咩係我唔睇得？」
偏偏我女友係一名烈女，後來佢作出咗一次大反擊，就係反摷佢阿媽啲櫃桶同埋手袋，又拆晒阿媽啲信，仲試過幾次唔敲門就直接殺入阿爸阿媽間房。
我問Kelly：「你唔怕世伯伯母咩咩呀？」
Kelly：「怕咩？我唔敲門，摷佢袋，拆佢信，卒之輪到佢發忟憎，話我點可以咁冇禮貌，仲話如果我衝入嚟嗰陣佢換緊衫咁點算？」
我：「係囉！咁點算？」
Kelly：「冇咩點算，我問阿媽，一家人講咩私隱呀？你有啲咩係我唔睇得？然後我早午晚一日做三次，連續兩個星期都係咁，跟住阿媽就冇再摷我啲嘢喇。」
好多人認為身有屎先會驚人摷嘢，其實根本唔係呢個問題，每個人都應該有自己嘅私隱，或者你會覺得Kelly咁做好忤逆，但佢的確做咗一次完美嘅示範。
上一篇兩性文章：女朋友 嘅飲食喜好你記住了嗎？