讀者投稿：竹篙灣住戶
2020真係過得好艱難，生意唔好，整體經濟環境又差，想放假散心亦寸步難行，仲有個武漢肺炎死唔斷氣，究竟食蝙蝠嗰班打靶死晒未呀？佢哋未死真係冇天理！
公司早排已經實施過兩次wfh，但總唔可以365日都stay home，始終每一行都要面對唔同嘅難處同制肘，我哋就比較依賴公司個內部system，好難下下遙距，所以短暫wfh之後都有返office。
只可以講句，是福不是禍，是禍躲不過，有位同事較早前確診，然後我哋全office嘅人都要隔離……隔離唔緊要呀，呢排真係凍到仆街吖嘛！
好多人話竹篙灣檢疫中心三餐難食，我個人其實冇咩感覺，可能係對食方面冇咩要求，平時自己喺屋企都係食杯麵，所以對我嚟講最難頂係上網好慢，相信大家都聽過竹篙灣冇WiFi，只可以用上網卡，但呢度就算用自己電話啲network都收得好差（可能係我個台差啦），就算唔介意浪費data去煲劇打發時間，你都好難舒舒服服睇完一套劇甚至一條片。
本身我唔係嗰啲會投稿嘅人，成世仔都未投過稿，而家係因為上網又慢又唔知有咩做，所以先用電話開個備忘錄出嚟打下文，好在有幾個朋友冇嫌我煩，相當樂意同我傾下電話解悶，否則我都唔知點捱呢十幾日。
有身邊人中招，隔離係必須嘅事，問題係偏偏要揀聖誕同除夕呢段日子隔離，話就話禁晒晚市，乜嘢節日plan都冇啫，但總唔會諗到除夕要喺竹篙灣倒數啩！
有朋友安慰我，話竹篙灣已經好過駿洋邨喎，唉，呢啲嘢有需要鬥慘，有需要比較咩？咪又係一樣！
最好笑係我哋每年都會全公司去台灣旅行，因為有office喺台北，有當地同事，今年年初已經知道去唔成，當時仲有同事話好失落喎，失咩落吖，而家咪成班香港同事一齊入咗竹篙灣囉，都係灣啫，跨年tim呀！真係畢生難忘！
Sorry，灰到淨係識講呢啲爛gag，原諒我放負，祝我冇事啦！