有次send咗兩個candidate 去見工，嗰個係新客，我都係第一次同對方交手，佢請咗阿A，但我始終要盡一個headhunt嘅責任，問下究竟阿B衰乜嘢？呢份工見唔成啫，我都要幫個candidate 改進，例如講英文唔流暢可以練，答問題唔夠好亦可以改善，咁佢去見下一份工嘅時候就會多返啲勝算，點知個客答我：「阿B喺度撳電話，又眈天望地，好唔專心。」
我：「見緊工撳電話？」
客：「唔係，阿A入房見Manager先，阿B坐喺度等嗰陣，我睇住佢係咁撳電話同周圍望。」
我：「但係當時佢齋等喎，撳下電話唔過份啫，又唔係打機。」
客：「總之好唔專心啦！」
我真係R晒Jer，後來阿B想知自己衰咩，我就照直講，佢嘅反應都係唔相信：「吓！因為有人whatsapp我，拎出嚟睇咗一眼咋喎！佢係咪想我坐喺度唔郁？」
我知，我都同個客講咗同一番說話，仲要再激烈啲，我問係咪想個candidate好似稻草人咁坐喺度唔郁？但你撞著一個變態嘅客，根本就溝通唔到。
不過講變態都唔夠我同事嗰單經典，佢個candidate去咗interview，填咗form之後等咗一個鐘頭零四十五分鐘都冇人理，結果個candidate打畀我同事，我同事係咁打去HR條direct line都冇人聽，最後個candidate佛都有火，擺低張「訪客」卡畀receptionist就轉身走。
Candidate走咗之後就打畀我同事狂噴間公司，點知一直失蹤嘅HR突然打畀我同事，話呢位candidate等得唔耐煩走咗，接待處嘅小姐叫佢等多陣，個candidate仲要發老脾話：「你哋公司識唔識尊重㗎？」
即係叫人等咗接近兩個鐘，仲要反插個candidate，不過最正係咩？係個客同我同事講：「等咁耐都係想睇下佢有冇耐性，好唔好EQ。」最後點？梗係即刻blacklist呢個客啦！
其實見工都可以約略窺探到間公司嘅文化，candidate同你根本未有正式賓主關係，已經連撳電話同眈天望地都睇唔過眼，要人等個幾鐘仲好意思話係考EQ，將來正式入去工作真係有排受。
唔記得補充，我個阿A最後都冇take到個offer，因為仲有另一間公司請佢，阿A話去interview嘅時間feel到氣氛怪怪地，唔敢想像之後返工會點，雖然冇咗份佣金，我又小走咗個客，不過都係開心既，導咗candidate 去啲「19公司」仲唔安樂啦！