話說公司有個女同事Lancy好鍾意收兵，形容下佢先，樣方面ok㗎，雖然唔算好靚，不過真心大波，少少肥底，行出嚟成個look係嗰種豐滿型，所以即使唔係瘦瘦嗰種典型靚女，都依然吸引到好多麻甩佬。
Office有好多男同事拜倒Lancy裙下，淨係計盲嘅都睇得出嗰批已經唔少，IT部有個後勤兵、Sales Dept有個醫護兵、OA係佢嘅傘兵、Shipping嗰邊有隻哨兵、另外有兩個senior少少嘅分別係伙頭兵同運輸兵，當然啦，Lancy娘娘收得最多嘅係水兵，至於大將軍就真係唔知有冇，佢嘅social media只會post自己吃喝玩樂嘅相，耐唔耐出張性感照派福利，較早前就有輯泳衣相，係噴血嘅，又露波罅又露白淨腳仔，佢嗰期應該有「大project」唔知想昆邊個，我亦相信班兵仔睇完泳衣相會用好多紙巾。
Lancy喺我哋女同事面前成日用好mean嘅字眼數臭班兵，例如佢話後勤兵、醫護兵、傘兵嘅能力值太低，冇咩potential，得哨兵有啲功用，因為佢每晚放工都會畀張staff card隻哨兵，等對方朝朝幫忙打卡，自己9:30先施施然返到嚟，張枱仲已經有人擺定早餐喺度，係咪好誇張？原來波大真係可以打橫行。
我哋班女同事唔抵得？冇話咩唔抵得，既然「憑實力借錢點解要還」都有人講得出，咁Lancy憑大波收兵又點解要唔抵得呢？只係覺得佢有時好過份，對住班仔就嗲聲嗲氣，背後講嘢就尖酸刻薄而且好有心計，收唔收兵都好，作為一個人，佢嘅性格都好差。
Senior少少嗰兩件伙頭兵同運輸兵嘅角色比較重，唔止管接管送，其中一個就畀埋張自動增值嘅八達通出嚟，所以Lancy食lunch例牌唔使用錢，食得貴有男人埋單，食平民嘢嗰陣就用呢張八達通，咁office hour以外有冇用嚟Do其他嘢就唔知喇。
有隻運輸兵好癲，本身揸架二手日產CUBE，但因為Lancy話MINI Cooper得意，所以佢走咗去換車……唔通人哋話林寶堅尼好坐你又換呀？雖然同事間唔會知對方家底，不過呢間公司大約出得起幾錢人工就心照啦！溝女啫，唔使上晒頭嘅。
睇到八達通同換車呢part已經覺得好過份？未算！我哋office仲有水兵服侍娘娘，Lancy自己講嘅，佢成日拎返工嘅Vivienne Westwood、Chanel、Dior、Celine……等等嘅袋都係水兵送，仲承認用一段時間就會攞去米蘭站嗰啲舖頭放，一係套現，一係加啲錢再買新款，Lancy仲話手上嘅iPhone、AirPod、Apple Watch，仲有屋企個Dyson風筒都係水兵送，佢真係覺得自己好威，覺得有咁多禮物係自己嘅本事同成就。
女皇獨大嘅局面喺兩個月前起咗變化，唔係班兵仔起義，而係公司嚟咗個新仔叫Ian（叫親Ian都真係幾靚仔），仲要係我個department，我哋班冇樣冇波嘅平凡女人梗係望多兩眼啦，但原來Lancy都睇中Ian，仲係咁打探Ian啲嘢，究竟靚仔最後有冇同Lancy搞埋一齊呢？
預告定先，答案係：「有。」
喺Ian返工嘅第二日，Lancy就著到戰鬥格咁返工，低胸加黑絲閃耀全場，好明顯係急不及待要即刻出招。（未完待續）
大家有冇掛住情侶座啲post？我今日睇返呢篇《同你結婚嗰個真係你最愛？》嘅上下集，真係好唔捨得……https://hkofficedaily.com/?p=10009