冇乜生意之下，成班同事圍埋吹水，講下大家入行以嚟有幾多pair男女會員係成功步入教堂。
我自己入行日子唔算太耐，得一單咁大把，同事就經驗豐富好多，不過大家都講起一個現象，就係有唔少女會員都係受咗愛情重傷之後，嚟到識完個男會員就好快拍拖，然後喺好短時間內結婚，有幾個都係一年內，有人見過最快3個月，你又唔好以為一定係大咗肚喎，呢啲個案未必係奉子成婚。
作為一個男人，我好自然會諗女方係咪之前太傷心，所以搵到個ok既，就嗱嗱聲嫁咗去算數，咁樣似乎唔係嫁畀愛情，換轉係我，應該會好介意，我同事Debbie姐就分享咗佢好多年前一個親身經歷。
Debbie姐話，當日個女仔係畀個朋友夾硬拉過嚟join speed dating，一對一，一個package包咗幾次嗰隻，配對好就幫雙方約出嚟食飯。
喺呢度解釋返少少嘢，等大家睇得清晰啲，我公司基本上可大分為兩隻plan：A）群體嘅dating，可能係14男14女，亦可能係30男30女，費用平均300蚊；B）一對一，費用係4位數或以上，睇package，直接幫雙方約去餐廳單獨食飯。
入返正題，Debbie姐話當日個女仔識咗一位男會員，後者又真係對佢好好，食完一餐飯出咗兩三次街，已經知道兩個人拍緊拖，半年後更加宣布婚訊。個男會員期間有keep住同Debbie姐討教，例如一啲女性心理，或者問下有冇咩浪漫餐廳推介？所以Debbie姐同嗰個男會員嘅關係都好close，真係好似導師同學生一樣。
結婚當晚Debbie姐都有去飲，新娘台上台下都喊得好犀利，好多人覺得新娘喊係因為得到幸福，Debbie姐話佢看在眼裡，覺得嗰種喊係一個女仔唔可以同最愛嘅人結婚而流出嘅眼淚。
婚後兩個月左右，對新人去完honeymoon，男會員就好似以前咁搵Debbie姐傾計，話其實自己feel到個老婆唔係太鍾意佢，首先係外型上，個女仔係好典型嘅靚女，五官細緻，身型都好好，行喺街上絕對係回頭率好高嗰隻，而男方本身就係敦厚老實型，毫不起眼。其次係個男會員話，平日生活交流當中，好多眼神同埋互動都會感覺到，但又好難具體搵一件實例說明，不過兩個人相處，感覺嘅嘢係呃唔到人。
咁跟住之後點呢？對唔住，我老細無端端話冇嘢做可以提早收工，明日再續，今日開放討論先。😂