最近奧運成為茶餘飯後嘅話題，呢股熱潮已經席捲辦公室，公司班人都唔執輸，只要係office hour內有香港運動員嘅比賽，佢哋都會用電腦開住直播然後圍埋睇，但點會估到睇奧運都會搞到同事鬧交收場。
話說有個同事叫Ricky，佢不嬲係體育迷，咩運動都啱，但講嘢好直，唔識做人，同埋都幾憤世嫉俗，我都唔識點評論佢係啱定錯。有次大家睇緊何詩蓓，嗰場唔係爭牌，咁有同事就睇得好激動，而且不斷斟酌個名次，Ricky就講咗句：「除咗決賽之外，游泳項目其實係計時，唔係計名次，你冷靜啲先。」
跟住個同事就反駁，話如果唔計名次，點解要一齊游？分開各自游再計時咪得囉……我冇偏幫任何一個，但Ricky係講得啱，除咗決賽嗰場，其實爭晉級的確係計時間，但我都明白個問題係Ricky講嘢好掘，係會令人唔舒服。
我哋成班圍埋睇一個mon，Ricky就自己喺個位度睇，其實佢見到香港運動員攞到好成績係好激動，只不過就唔會join埋成班人喺度叫，因為公司真係有好多同事係唔識運動，平時唔睇唔做，有個根本連張家朗同伍家朗都分唔到，又有人講錯何詩蓓個名做李詩蓓，其實唔止奧運，連早排歐國盃都係咁，睇一場半場仲要係精華就亂咁批評，佢哋真係4年先睇一次波，4年先睇一次奧運呢類體育賽事。
咁你都可以話係跟風嘅，不過支持香港隊就唔使計得咁清楚啦！我私人fb都猛咁畀人洗版，個個貼晒奧運啲相，連老細都話要marketing同事出啲同奧運相關嘅post，但我哋本身嘅業務係風馬牛不相及，老細純粹係人出佢又出，死都唔執輸，又係嗰句啦，唔可以怪佢嘅，因為我見到好多page本身唔係體育嘢，又從來冇關心過體育，而家都一窩蜂講埋一份。
呢個時候，Ricky又講咗一番說話，聽落係啱，但又好mean，佢話：「你哋班友都幾搞笑，似足當年我老豆賺到錢買電視雪櫃返鄉下咁，啲親戚朋友又係勁虛偽，個個走嚟話一早睇好我老豆，支持我老豆，屌你成班人之前都未見過，亦冇提過我老豆，而家見到人衣錦還鄉就起哄。」
唉！呢句擺明係地圖炮，實出事啦！嗰個話「游泳唔計名次點解要一齊游」嘅同事，即刻同Ricky鬧交，又問Ricky有咩高見，係唔係幫香港運動員打氣都唔得……
人人喺office睇奧運都係喜氣洋洋，我哋office睇奧運就搞到同事閙交收場🤦🏻♂️
投稿讀者：家榮