女追男係咪隔層紗唔敢講，不過Lancy拎電話就相當直接，Ian返工嘅第二日，Lancy低胸黑絲戰鬥格驚艷office，借啲意行埋嚟搵我講無聊嘢，內容極度空泛，期間一直望住Ian，跟住突然出招。
Lancy：「咦，你隻Apple Watch新㗎喎，好唔好用呀？我覺得同上一代差唔多，仲諗緊買唔買。」
Ian：「佢其實來來去去咁上下，我都後悔買咗，應該隔代先買。」
Lancy：「我有friend喺入面做，下次你買搵我吖，有折，加返個WhatsApp先。」
犀利！Lancy係咪有friend喺蘋果做我就唔知，但佢手上隻錶就肯定唔使用自己錢買，咁講都係想呃個電話Number啫。
其實Ian呢個男仔都幾謙虛幾好玩，如果我唔係有老公可能都會倒追佢🤣不過靚仔真係冇安全感，坐喺隔籬成日聽到佢同女仔講電話，仲要好明顯係唔同嘅女仔，今晚睇戲，聽晚食飯，後晚返屋企玩煮飯仔，有冇咁好精力呀？
Lancy亦相當進擊，每日走幾轉嚟搵Ian，搞到其他啲後勤兵、伙頭兵、運輸兵、醫護兵、傘兵……等等都好妒忌，有隻水兵仲搞笑，趁我行入pantry嗰陣套料，問我Ian同Lancy係咪拍緊拖，又問Ian係咪認真，臨尾仲加咗句好唔自量嘅說話：「你同Ian講呀，如果佢玩Lancy，我唔會放過佢㗎！」
我真係笑咗出聲，貴姓呀先生？你水兵嚟咋，做兵嘅大忌係唔清楚自己定位。
返埋位之後我忍唔住同Ian講：「Lancy有隻兵叫我警告你喎，其實你兩個係咪拍拖啫？」
Ian：「唔算啦，出下街之咋。」
「嘩，原來已經出埋街？Lancy有冇水你買嘢？」
Ian：「你點知㗎？」
「定律嚟㗎啦，老老實實佢帶你去買咩？」
Ian：「咁我又冇買，同埋頭兩次出街係咁啫，之後都係正正常常食下飯。」
「痴線㗎，你返咗呢份工唔係好耐咋喎，究竟你哋出咗幾多次街？佢想你買咩呀？」
Ian：「第一次出去K11，新嗰邊，樓下咪全部名店嘅，佢話要買個名牌袋，行咗入去睇，問我邊個靚，又問我意見好唔好買，鬼識咩，然後佢就講笑咁話不如我買畀佢。」
「呢招高，搏你真係買，你買就bonus，唔買佢就話係講笑。」
Ian：「我知，呢啲女仔我有遇過，識得點樣應付，只要你唔充大頭鬼，唔好心軟，基本上安全，之後我同佢出去直頭唔帶卡，只袋身份證同現金。」
「哈哈，唔知以為你去傳銷講座，就嚟要搵朋友報定警，再之後呢？」
Ian：「之後又係食飯，又係話最近想買袋，叫我一齊入去睇入去揀，又係扮講笑咁叫我送畀佢，嘥氣啦，呢招對我係唔work！」
「掂呀掂呀，就係鍾意你呢啲後生仔，但佢次次都借頭借路同你入名店，你仲一而再再而三同佢出街？唔覺得咁樣好唔舒服咩？」
Ian：「冇喇，跟住幾次都係上我屋企食，叫外賣。」
「你一個人住？」
Ian：「係呀，做咩？」
「咁你哋有冇？」
Ian：「都成年人啦，有都好正常啫。」
原來已經食埋。
不過老老實實，我從未見過Ian主動去搵Lancy，次次都係Lancy行埋嚟，因為Ian本身多女圍，公司有女圍，佢電話WhatsApp都未停過，愈係咁樣，Lancy就愈進擊，有次星期一Lancy行埋嚟就對住Ian嗲聲嗲氣，旁若無人咁問：「星期六日去咗邊呀？msg又唔覆，電話又冇聽。」
Ian：「可能miss咗睇唔到。」收兵娘娘罕有地畀人耍返轉頭。
其實呢種心態同關係唔難明白，感情世界裡面，狗公慣性狗衝，佢哋唔明白太易得到嘅嘢冇人會珍惜，相反若即若離同埋忽冷忽熱，先至會令一個女仔魂牽夢縈，情況就等於嗰啲限量名牌手袋一樣，你準備好錢，又留晒電話落waiting list，不過人哋都未必賣畀你，咁先會令你囉囉攣同埋牽腸掛肚。
Lancy喺office班兵嘅心目中係限量名牌手袋，不過Ian先至係Lancy心目中最想要嗰個袋。
最反常係Lancy竟然打內線向我訴苦，話Ian成日唔理佢，大家識咗咁耐，Lancy真正目的又點會逃得過我法眼吖，講到尾咪又係想索料，因為我坐Ian隔籬，佢想知道Ian有冇提起佢，又或者知唔知Ian係咪有固定女朋友。
我冇答唔係因為偏幫Ian，而係Ian個衰仔本身嘅男女關係都七國咁亂，你問佢有冇炮友我答到你，問佢有冇固定女友就真係唔知，同埋Ian的確冇喺我面前主動提過Lancy，就算上次默認同Lancy發生超友誼關係都係我提起先，Ian只係蜻蜓點水式輕輕帶過。
有一日Lancy破天荒搭正9點返工，然後走埋嚟Ian個位擺低份三文治同一杯咖啡，仲要同我講：「你叫佢記得食喎！」Oh No，我哋嘅收兵娘娘竟然做埋伙頭兵？
見到Lancy變得死心塌地，等到Ian返嚟之後我就問佢：「從未見過Lancy返咁早同埋買早餐畀人，你有冇少少感動？」
Ian：「冇。」
「佢對你係特別好，唔同對其他兵，諗諗佢啦！」
Ian：「唔會啦，散拖ok，認真就no喇。」
「因為佢叫過你買名牌袋，你淆底？」
Ian：「唔係，最大問題係價值觀同埋大家唔夾，同Lancy一齊嘅時候，佢講嘅所有話題都同錢有關，例如啲牌子出咗咩新款、最近買咩股票、同事幾錢人工、有咩生意好做……呢啲嘢我全部冇興趣。」
「可能係女仔通常比男仔實際啲啫。」
Ian：「你有冇Lancy IG？佢啲post好作狀，社會運動嗰陣，佢有幾個post嘅caption寫住心繫香港，心痛年輕人乜乜乜，但張張相都係high tea、三點式、show名牌笑晒咁，唔係咩藍黃問題，而係呢個人冇思想得嚟又好有機心，你明唔明我講咩？」
「明，駁唔到。」
Ian：「男人好得意，邊種女人啱拍拖，邊種女人啱玩玩下，邊種係適合結婚，其實分得好清楚，我諗女人都會咁樣分類，你睇幾多女明星拍拖嘅時候都係同俊男一齊，然後忽然宣布結婚就揀個地中海大肚腩有錢佬。」
「又好似係……咁你第日係咪會娶個醜女人？」
Ian：「哈哈，總之唔使好靚，老婆大方得體就ok！」
結局係點？結局就係冇結局，Ian同Lancy依舊各自做萬人迷，但佢兩個就keep住曖曖昧昧嘅行為，對Ian嚟講係做返自己，不過對Lancy嚟講就唔係，以前只有兵仔服侍，佢會擇肥而噬，你永遠唔會見到Lancy蝕底畀人，但而家佢對住Ian就好似女兵一樣，有時幫Ian公事上執手尾做後勤兵，有時幫Ian買早餐做伙頭兵，聽講仲會morning call Ian做哨兵，咁我相信都唔少得做埋Ian嘅炮兵。
或者呢啲就叫一山還有一山高啦，Ian無疑係Lancy心目中嘅大將軍，只係大將軍心目中其實冇佢。
《Office收兵娘娘 1》運輸兵水兵哨兵全部收齊
https://hkofficedaily.com/?p=18252