2018年4月，我失業，同一個月內，我同男朋友分手，雖然呢段日子好難捱，不過我冇流過一滴眼淚。
用咗兩個月時間send過百份CV，得3份有回音，第一份畀個好串嘅interviewer質疑，搭車用咗一個鐘，等咗30分鐘，而見工過程只係5分鐘。
另一份上到去先知係傳銷，佢出廣告扮請文職，上到去係咁說服我買佢啲貨做傳銷，幾個人輪流轟炸，我差啲就報警。
為咗呢兩份工，我買咗對新鞋，臨見工前一晚係咁練習自我介紹同埋Q&A，最後竟然係咁。
見第3份工嗰陣開始冇信心同埋悲觀，個interview係1對2，我對住一個HR同埋一個department head，喺房準備開始in嗰陣，擺喺隔籬櫈嘅手袋跌咗落地，裡面嘅唇膏同物件跌到一地都係，我講完唔好意思之後烏到身想執，聽到有人「褶」咗一聲，唔知點解，我忍唔住喊咗出嚟。
失業，我冇喊；失戀，我冇喊；見第一份工畀人踩，我冇喊；見第二份差啲畀人禁錮買貨做傳銷，浪費時間同心機，我都冇喊，但而家只係手袋跌咗啲嘢出嚟，我竟然喺度喊，有冇人會明白呢種成年人嘅崩潰？
我怕阻大家時間，擺返正個手袋之後，打算結束interview先慢慢執地下嘅物品，一坐返起身，兩行眼淚不由自主咁流，頭先「褶」一聲嘅人原來係department head，佢見我咁嘅狀態，同身邊個HR講：「Tracy，你繼續見吖，我出返去做其他嘢先。」
當時已經知道份工一定衰硬，我真係唔知點解自己會喺呢一刻先嚟崩潰。
呢位叫Tracy嘅HR向我遞上紙巾，叫我慢慢嚟，又問我仲可唔可以繼續interview，我話應該可以，但之後嘅對答簡直係垃圾，因為喊完已經遊魂，最後仲要Tracy安慰返我轉頭，以為今次interview會草草結束，冇諗過Tracy同我分享一啲見工嘅心得，例如點樣強化自我介紹，失業嘅原因可以點樣修飾，仲提我描述之前嘅工作經驗應該強調邊啲位。
其實佢冇義務咁做，我亦都知今次interview唔會有下文，但Tracy仍然肯花時間，希望我之後見工可以改進。
更令我意想不到嘅係，interview之後3日，Tracy主動call我，佢話打嚟嘅目的只係想通知我已經請咗人，嗰陣我嘅狀態已經好返好多，同Tracy講明白interview表現咁失控，一定唔會有機會，但好多謝佢抽時間向一個落選嘅candidate交代結果。
Tracy喺電話度仲叫我加油，甚至問我搵工搵成點，又提議CV有邊啲位可以寫得好啲，冇諗過呢個世界仲會有咁善良嘅人。過多半個月左右，終於搵到新工喇，雖然Tracy間公司冇請我，但嗰次interview同埋佢嘅建議真係幫咗我好多。
而家一切安心，希望呢位咁好人嘅HR都一樣。
—
😪 之前另一個interview故事都出現過眼淚，但身份角色調轉，最後連份工都……
《見工變咗傾心事 調返轉安慰HR》
https://hkofficedaily.com/?p=13332