《診所低能奇觀》 聞聞佢

有日一位女士嚟到診所。

佢一入到嚟就行去坐低,然後喺位度嗌:「姑娘~姑娘」

我:「有咩事呀?你要登記睇醫生可以過嚟喎」

佢繼續大嗌:「你過咗嚟先啦,我病人嚟㗎,你可以同我咁遠講嘢㗎咩?」

我:「聽到就可以啦,你係咪好唔舒服呀?行唔到呀?」

佢:「係呀係呀」

我唯有出去啦咁。

出到去,我:「你俾身分證我先呀,我同你登記呀」

佢冇出聲,彎低腰除咗自己隻鞋。

我望住佢,佢除完鞋就抬高頭望住我講:「過嚟呀」

我:「你俾身分證我得㗎啦,我會幫你登記㗎啦」

佢伸長隻腳:「你過嚟聞吓我隻腳係咪有陣味呀?」

呢啲粗重嘢我唔做㗎喎!你不如試吓上網搵人呀?應該有唔少人想做。

我:「你有咩唔舒服同醫生講得㗎啦,我淨係可以幫到你登記㗎咋」

佢:「你唔係要做分流㗎咩?你都要睇吓我係咪真係有需要睇醫生先登記㗎嘛,唔通冇病嗰啲你都照登記俾佢入去睇醫生呀?」

係呀,嚟得診所就係要入房睇醫生㗎啦,唔係仲有咩好做呀?

我:「我唔駛做呢啲㗎,醫生先係專業㗎嘛,你同醫生講有咩唔舒服就可以啦,你俾身分證我呀」

佢抬高少少隻腳:「你要身分證嘅話嚟聞咗先,有陣味就俾你」

請問係咪玩緊啲咩嘢女皇呀?我唔係你隻奴喎,死開啦。

我:「你要睇醫生就俾身分證我啦」講完就轉身入返去登記處。

佢繼續坐喺位:「姑娘?姑娘!你聞到有味我先睇囉都話。」

我冇理佢。

佢自己著返鞋行嚟登記處拍咗一下枱:「我以後唔駛你幫我呀!以後唔睇呀!」

佢離開咗診所。

你自己聞飽佢啦…



👉🏻即睇其他診所低能奇觀嘅文章

👉🏻《診所低能奇觀》 硬?邊到硬?
https://hkofficedaily.com/?p=15835

我叫珍寶豬,係一個診所助護,只係一個無能無專業資格無牌照的大嬸。做過晒港九新界中西醫診所,見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事,但請勿公開任何病人個人資料或病人相片。看此PAGE時請勿對號入座,信則有,不信則無。

error: