Set咗叉電器偷拍鏡頭之後，內心其實好糾結，亦都好唔舒服，我承認對世伯有敵意，咁係因為佢由第一次開始已經唔友善。
同屋企人去澳門係真嘅，但三日兩夜係假嘅，因為只係兩日一夜，我全程都Whatsapp Yvonne，買咗船飛影畀佢睇，我阿媽喺船上面瞓覺又影畀佢睇，check in入到酒店房都影埋畀佢睇，咁樣做純粹想Yvonne放低戒心。
第二日傍晚返香港，我喺碼頭轉搭的士返屋企，心急想知道個cam影到咩，但心情又好不安。
猶豫咗一陣先上樓，我發現開唔到閘……
呢間屋有一道閘，一度木門，正常當然開到啦，但係度閘可以喺𥚃面反鎖，如果反鎖咗，喺出面就算有鎖匙都開唔到，所以我只能撳門鐘。
當時內心已經諗緊唔好嘅嘢，過咗兩分鐘左右，Yvonne開門，劈頭第一句對白都係我意料之內：「唔係聽日先返咩？」
佢一路講一路開閘，入去已經見到世伯坐喺度，佢又講同一句對白：「咦，Yvonne又話你去咗澳門嘅。」
我：「係呀，提早返，你哋自便吖，我入房擺低啲嘢，叉下電先。」順手就將客廳個叉電器拔走，同自己講要冷靜，然後入房閂門。
嗰個cam拍出嚟嘅質素好差，起格起到離晒譜，不過我仍然見到呢一幕……
一男一女喺客廳梳化攬住，兩個人kiss，期間男嘅將女嘅反轉，要女方瞓喺佢上面，再繼續kiss，我唔想形容得太細緻，因為原意唔係要講咸故，我自己個心都好難受。
雖然畫面好濛，佢兩個kiss多陣仲要起身行開，我相信係一齊入房，但所有嘢已經有答案，呢一男一女就係Yvonne同世伯。
我冇衝出去大吵大鬧，原因有兩個，第一，呢度始終係Yvonne同佢阿爸嘅地方；第二，我已經決心分手，因為睇畫面都知道Yvonne唔係被迫，佢喺梳化有主動迎合。
嗰日世伯離開之後，Yvonne明顯心虛，當我走入廚房洗杯嘅時候，佢走入嚟從後抱實我，我突然有想嘔嘅感覺。
Yvonne：「攰唔攰呀，今晚幫你按摩。」
本身答應自己忍住，但真係唔得。
我：「放手。」
Yvonne：「做咩呀你？」佢鬆開手，移一步向前喺側邊望我。
我：「點解咁嘔心嘅事你都做得出？」
Yvonne：「講咩呀？」
我：「你同你阿爸有唔尋常關係，你以為我唔知？」
Yvonne突然發好大脾氣：「痴線㗎你！」
我：「使唔使我拎證據出嚟？」
Yvonne冇答我，佢走返出廳，扮睇住本身開著嘅電視，但好明顯逃避緊問題，我亦唔想再講落去，因為成世仔都未諗過身邊有人會亂倫，仲要係我女朋友，同時間，怕佢用set cam呢樣嘢反咬我一口，所以盡量避談。
坦白講，我考慮過最絕嘅做法，就係一直唔發脾氣，一直唔畀Yvonne知道我已經發現，然後慢慢打探佢阿爸究竟住邊一座邊一戶，我好想搵Yvonne阿媽傾下，究竟呢個係變態家族，定係呢個唔係親生阿爸。
我亦有諗過Yvonne係被迫，但可能性唔大，除咗梳化嘅畫面，仲有平時我向佢提出不滿，例如接受唔到阿爸拍阿女屁股，接受唔到佢著住底褲唔戴bra同阿爸睇電視，但Yvonne次次都為世伯護航，如果真係有苦衷，Yvonne絕對有足夠時間同機會向我求救。
一邊執衫同埋日用品離開，Yvonne有望過我，但一直冇出聲，我好想佢有一啲突破性嘅解釋，但係冇。
放低鎖匙，出門，大家一句嘢都冇再講過。我記得緊接落嚟兩日都請咗假，因為唔想接觸任何人，呢個世界根本就痴撚線，人真係一樣好恐怖嘅生物。
我以為同Yvonne唔會再聯絡，點知佢幾日後主動搵我，問可唔可以出嚟飲杯嘢？
我：「唔需要啦！」
Yvonne：「出嚟先啦，有嘢想同你講。」
冇錯我係好嬲佢，諗起佢同世伯嘅關係都想作嘔，但心裡面始終期待佢同我講對唔住，亦想佢花少少時間解釋，雖然大家已經冇機會再一齊。
喺coffee shop見面，大家已經變得好陌生，率先打破沉默嘅係我。
我：「你有咩想講呢？我唔想聽亂倫咸故喎！」
Yvonne：「佢唔係我阿爸。」
我：「繼續吖！」
Yvonne：「佢係我以前份工嘅老細。」
我：「不如你一次過講晒啦好嘛？唔好講一句，又要我問一句，即係你畀人包？」
原來呢個所謂「世伯」，係佢對上一份工嘅老細，當日呢個男人唔止追佢，仲不斷提供生活上各種需要畀Yvonne，雖然兩個人嘅年齡相差一大截，但Yvonne同自己屋企人關係麻麻，慢慢地接受咗呢種夾雜住父愛同男女之間感情嘅關係，當然仲有經濟上嘅援助。
無論點樣修飾故事，講到尾咪又係被包養，有分別咩？
後來呢個男人建議Yvonne辭職，再喺本身住緊個屋苑搵間屋畀Yvonne，幫佢搬出嚟住唔使對住屋企人，又可以方便見面，簡單啲講，就係老一輩玩女人好鍾意做嘅行為－－－－－金屋藏嬌。
呢位「世伯」唔止全數負責屋租，每個月仲會畀零用錢，但Yvonne冇透露有幾多。
我：「咁我想問，既然你有人包，點解後來又再搵工呢？其實你唔搵新工咪好囉，咁我哋就唔會識，唔會做同事，唔會喺埋一齊，你仲同我一齊想點呢？」
Yvonne：「我同佢之間有個協議，就係唔干涉大家嘅私生活，正如佢有老婆一樣，我都唔會叫佢離婚，但我唔想自己個世界咁狹窄，如果有一日佢厭咗，我唔想同社會脫節，所以佢有老婆，我點解唔可以有男朋友？」
我：「咁你話之前同個女仔friend合租都係假㗎啦！」
Yvonne：「真，但個女仔friend後來識咗條新仔，搬咗出去同人住，所以得返我。」
我：「你同你啲friend都幾好笑。」
Yvonne：「我個friend唔知，因為佢以前唔係成日上嚟，一個月先得兩三次，所以我個friend冇見過佢，不過自從你出現之後，佢嘅佔有慾強咗好多，好似想向你示威咁，佢話接受唔到我有其他男仔，仲話會同老婆離婚，想同我一齊。」
我：「犀利，可歌可泣，咁你又幾發喎，又有阿叔畀錢你用，又有我交租。」
Yvonne：「我畀返啲租你囉！」
我：「唔使，我有份住，畀返份租好合理，大家不拖不欠，最後想問一句，你同我一齊之後，有冇諗過同佢斷絕關係。」
Yvonne：「有，但係第一次你哋見到嗰陣，我諗唔到點解釋，始終佢年紀咁大，我冇可能有呢個年紀嘅朋友，結果同你講咗係我爸爸，所以由一開始已經返唔到轉頭，加上佢而家愈嚟愈認真，佢同佢老婆已經冇感情㗎喇。」
我：「得啦，唔想聽你哋嘅愛情故事，祝你好運啦，講完未？我走先。」
Yvonne：「等等，其實我今次約你出嚟，係想你應承我一樣嘢。」
我：「斷估唔係想我陪你做戲，迫你個阿叔離婚啩！係就唔使預我。」
Yvonne：「唔係，你可唔可以答應我，唔好將呢件事講畀舊公司任何一個人聽？」
我：「我真係好傻，以為你出嚟想同我講對唔住，以為你想為呢段感情做返啲嘢，原來你係想叫我唔好講畀班舊同事知。」
Yvonne：「你可唔可以應承我？」
我：「放心，我自己都覺得樣衰，唔會想識得我嘅人知道，我哋當冇識過啦！你好自為之，Bye！」
聽完Yvonne解釋，我反而平靜咗，雖然覺得自己好似on9仔，但之前嘅憤怒係源於女友同阿爸嘅相處模式，而家知道係個阿叔金屋藏嬌，所以相比起真正嘅亂倫，心理上冇咁難接受，不過呢件事對我嚟講始終有影響，直到目前為止，我都唔敢再拍拖，希望可以盡快走出陰霾，下次唔好再遇到咁複雜嘅女仔。
– 完 –
==
《世伯》1 https://hkofficedaily.com/?p=15857
《世伯》2 https://hkofficedaily.com/?p=15890