有一句說話每次聽到都好想作嘔～～～女兒係爸爸嘅前世情人。
唔知點解，好有亂倫feel，不過我咁反感，或者係同自身經歷有關，因為我女朋友嘅爸爸唔太鍾意我，甚至可以話係充滿敵意。
我同女朋友係同事，換言之係工作上認識，佢叫Yvonne，眼大大面尖尖，隔籬team都有人想追佢，但係近水樓台先得月，Yvonne坐我前面咋，我日日mark實佢食lunch，平時又大獻殷勤，結果用咗兩個月時間就追到佢。
我哋嘅同事關係維持咗三個月啫，因為Yvonne喺試用期完結之前resign，佢覺得份工唔適合，不過我同佢嘅情侶關係就冇變，係見少咗囉，由以前一星期見六日（一至五返工，weekend見一日），變成後來一個星期見得一次。
有好有唔好，Yvonne之後冇即刻再搵工，成個人宅咗，好多時都話想留喺屋企，亦都因為咁，我終於有機會上Yvonne度喇，我哋兩個人第一次「親密接觸」，就係喺Yvonne屋企。
Yvonne住嘅地方大約400幾呎，一個人住算好闊落，兩房一廳，Yvonne話之前有個女仔friend同佢住，但對方最後識到男朋友所以搬走咗，而家得返佢一個人住。
我：「幾錢租？」
Yvonne：「都唔使交租。」
我：「嘩，你咁後生就做業主，我好慚愧……」
Yvonne：「唔係唔係，屋企人㗎！」
我：「原來你屋企咁有錢，我都想搬出嚟住，但周圍都貴租。」
Yvonne：「橫掂有房，你搬嚟住囉！」
我：「邀請我同居喎，咁好？」
Yvonne：「同居你個頭，你瞓我朋友間房咋。」
我：「認真？我交返份租好唔好？起碼都要負責水電煤，否則我住得唔安樂，雖然你話層樓係屋企人啫，但你而家冇返工，你咪收我少少租當生活費囉！」
Yvonne：「都好。」
後來我去佢屋企樓下嘅地產舖研究，呢個屋苑呢個呎數，租金大約係15000至18000咁上下，所以我膽粗粗提議酌量畀8000租金，另外我交水電煤。
Yvonne：「淨係租得啦！」
我：「咁我唔客氣喇，包租婆，呢度8000蚊租金，請笑納。」
其實我同Yvonne係好投契，大家嗜好差唔多，性格都有唔少相似地方，加上曾經共事，所以講公司嘢佢都會明，大家感情真係好好，同居後生活愉快。
大約過咗兩個星期，某一日我放工返到屋企，有個男人同我女朋友一齊睇電視……
Yvonne：「返嚟嗱？呢個我爸爸，呢個係浩然。」Yvonne簡單一句介紹我哋認識。
我：「Hello 世伯。」
世伯點點頭，冇笑容，好嚴肅，跟住起身話係時候要走，似乎純粹等我返嚟望一眼，盤算下佢個女嘅男朋友。
原來Yvonne爸爸住喺同屋苑隔籬座，而家呢間屋係佢畀個女住，聽Yvonne講，爸爸周不時會買啲日用品上嚟，耐唔耐亦會上嚟同個女食飯。
第二次見世伯係相隔三星期後，又係一個閒日嘅夜晚，Yvonne有提前講聲，所以我都好識做斬咗料。
佢爸爸成餐飯冇一句好說話。
世伯：「浩然而家搵幾錢一個月？」
我：「二萬幾。」
世伯：「無三不成幾，即係二萬三定二萬九？」
我：「二萬頭啫，但係份工有佣，佣就比較浮動。」
世伯：「收入唔係好穩定咋喎，有冇打算同Yvonne結婚？」
我：「結婚？」
世伯：「即係冇啦！你有冇車。」
我：「有車牌不過冇車。」
世伯：「你係咪打算要Yvonne第日出街迫巴士迫地鐵？」
我：「世伯，香港養車貴，泊車又難，其實地方咁細，有時搭車仲快仲舒服啦，我日日搭的士仲平過養部車。」
世伯：「男人係要解決問題，唔係逃避問題，養車貴唔應該逃避，應該諗方法賺多啲錢去克服佢。」
句句都係同錢有關，知喇！你有兩層樓揸手吖嘛！我得廿幾歲仔，你成五十幾歲人，要咁樣比較我都冇辦法。
可能係見我冇回應又黑黑哋面，Yvonne終於出聲打圓場。
Yvonne：「食飯唔好講呢啲啦！爸爸你又話要買糖水畀媽媽嘅，快啲返去啦，夜喇。」
世伯走嘅時候，喺門口攬一攬Yvonne，錫咗佢額頭一啖……咁樣真係正常咩？？？
我：「當你係佢個女定係佢條女呀？」一閂門我已經忍唔住，相信世伯喺門口應該都聽到。
Yvonne：「你咁嬲做咩呀？嬲佢頭先問你人工同埋有冇車？」
我：「你唔覺得你阿爸有問題㗎咩？下下講錢，正式第二次見啫，係咪要我有幾百萬身家先叫年輕有為呀？」
Yvonne走過嚟攬住我：「唔好嬲啦，老人家係咁，佢都係關心我啫，最多今晚聽晒你話。」
可能我真係反應太大，何況我始終住緊佢阿爸間屋，無謂令自己同Yvonne難做。
自從嗰次之後，世伯多咗過嚟打躉同食飯，有時無聊到夜晚10點幾買糖水上嚟，呢啲都係小事，我最睇唔過眼係佢好鍾意對個女摸手摸腳，有一次我簡直呆咗，開飯嗰陣見佢喺後面拍咗Yvonne屁股一下，雖然係輕輕一下，但我作為男朋友嘅感覺好差。
因為呢件事，當晚我同Yvonne第一次吵大鑊，我覺得就算係阿爸，呢個行為都唔恰當，個女已經20幾歲啦！
Yvonne仲要話佢阿爸係咁，我真心想問下，個女幾歲就話正常啫，20幾歲喎，佢男朋友喺度㗎喎！
個人認為世伯愈嚟愈過份，我已經分唔清不嬲係咁，定係佢個女有男朋友之後先特登做畀我睇，世伯究竟係猥瑣抑或呷我醋？我將呢啲嘢同咗自己最好嘅朋友講，點知我個friend都話我太敏感，又分析係世伯有敵意在先，所以令我見到咩都反感。
再後來有一次，我放工返嚟見到另一幕更火爆……