劈頭利申，中裸聊陷阱條友坐喺我隔籬，得佢「批准」我先至投稿，呢條傻仔話最近喺telegram見到2021年仲有人中招，所以想提醒各位咸濕仔喎。
費事咁冇品啦，幫佢化一化個名叫阿健，夠晒普通喇啩！大約兩年前，呢條友失驚無神走嚟遞辭職信，我心諗做得好地地又扭咩屎忽花呀？問咗幾次都吞吞吐吐。
我叫佢講啦，公司嗰陣玩緊自然流失，總之有人走咗就唔會再請，做得唔開心咪三口六面拆掂佢囉！點知阿健猛咁話冇事，總之一定要走，仲要即刻走，又問我可唔可以當炒佢，因為佢冇錢畀代通知金。
大佬呀！但係我炒你，公司要畀返代通知金你呢！同埋手續上我係要同人事部交代，老細都會問我點解炒你㗎嘛，唔通我答佢哋：「唔知喎，條友叫我炒佢，我咪炒囉！」
阿健求咗我好耐，強調咗好幾次：「呢鑊嘢唔走唔掂」，我問佢係咪穿櫃桶底呀？不過冇理由吖，我哋部門嘅工作範圍都冇錢過手，定係偷咗公司嘢呀？但係公司啲嘢又殘又舊，冇可能吖！
氹多兩氹，阿健終於講出原因，原來係中咗裸聊陷阱，即係咁，身為一個經理，下屬有乜嘢辭職理由係未聽過吖，但係話中咗裸聊陷阱所以resign就真係聞所未聞，好嘢呀！呢條友有啲料到！
咁佢中裸聊又同辭職有咩關係呢？換言之阿健畀人屈錢啦！屈錢唔係更加需要返工賺錢畀人呃咩？
阿健話最初想同嗰條女發展（其實佢應該一直係同個麻甩佬談情），傾下傾下熟咗，對方就話阿健成日唔定時食飯，咁樣好易胃痛，然後問阿健拎公司地址，話要幫佢叫外賣喎，然後阿健就成張卡片影相send畀人喇！
最好笑係人哋最後都冇叫飯畀佢。
我話阿健白痴，阿健就話最初真係有情侶feel，齋打字都可以墮入情網，仲交換埋裸照，當然人哋嗰張係流嘢啦，佢就send真嘢畀人，然後對方不斷旁敲側擊問咗阿健好多個人資料，包括屋企同埋公司地址，結果被勒索8萬蚊，唔畀錢就散佢啲裸照出去。
阿健當時已經畀咗7000蚊對方，但係個騙徒又點會罷休呢，甚至恐嚇會將啲裸照print晒出嚟，貼去我哋公司門口，要搞到人人都知呢間公司有男同事裸照流出。
我問佢報警未？阿健話冇用，唯有辭職同公司劃清界線，同埋好驚有一日返工真係見到門口貼住裸照，所以想先行一步辭職，唔敢面對喎。
勸咗阿健好耐，佢最後都有去警署備案，雖然乜都幫唔到佢，但起碼阿健可以向對方show嗰張唔知報案定備案紙，搞搞下個騙徒亦冇再滋擾同恐嚇喇。
我私底下笑足阿健兩年，本身都淡忘㗎喇，係阿健再提起，佢話最近喺telegram見到有人又中呢啲騙局，冇諗過嚟到2021年仲有咁多傻仔，所以佢想告誡一眾咸濕佬，咸都要咸得理智啲，唔好輕易入錢畀人，唔好買咩點數卡，個人資料更加唔可以暴露，就算係識得嘅人都未必信得過啦，何況對住唔識嘅人呢！
話時話，tg呢樣嘢，水能載舟亦能覆舟，資訊可能保密咗，但真係有唔少騙徒利用呢個特點去偷呃拐騙，因為比較難追查吖嘛，所以男男女女都小心啲喇，記得用個腦思考，唔好成日用下體諗嘢呀！
投稿：三上油壓