電話響起～
我：「你好，乜乜診所」
對方係一位女士：「我俾嘢拮到呱呱叫呀！」
下句係咪要對哈哈笑？
我：「你嚟睇醫生呀？今晚收八點呀，八點前嚟到登記就可以啦」
佢：「行唔開呀，你教我點做呀？」
我：「喺電話度我哋唔知你而家係咩情況，俾唔到任何意見你呀，你有唔舒服嘅話要嚟睇醫生呀」
佢：「我打去999佢哋又教到我？」
咁你搵人教咪得囉，仲駛咩多舊魚打嚟問我啫？
我：「人哋教咗你，你有冇跟住做呀咁？」
佢：「冇囉，你教我點做呀？」
你都唔聽教嘅，仲教嚟托咩～
我：「你有唔舒服嘅直接嚟睇醫生啦，醫生先幫到你，我喺電話度俾唔到建議你」
佢：「隻蝦拮到我，你唔教我點做一陣我要截肢點算呀？」
你要截肢嘅話應該唔係因為冇人教你。
我：「所以我咪叫你嚟睇醫生，有需要嘅話醫生都會幫你洗傷口嘛」
佢：「洗傷口要考醫生牌咩？」
佢再講：「醫生考個牌返嚟係靠洗傷口賺錢㗎咩？」
佢再再講：「我咪講咗我行唔開囉」
我：「如果真係行唔開嘅話，我哋都冇其他嘢可以幫到你，你想知點洗傷口嘅話可以上網搵搵，有片睇住嘅應該比我喺電話度講解更易明。如果你冇洗傷口用品嘅話，都可以用清水沖沖個傷口先，不過最好都係嚟睇醫生俾醫生處理，等醫生睇吓你嘅情況先。」
佢：「人哋話用梘液再唔係用尿都得㗎喎，一定要用洗傷口嘢㗎咩？」
咁你自己屙篤尿浸吓佢啦。
我：「你唔好亂咁自己嚟呀，一係嚟俾醫生處理啦」
佢：「咩都搵醫生，係咪搞唔掂截肢可以入佢數呀？」
嘟，佢CUT咗我線。
明明應該入你自己數…講完你又唔聽，我都唔知你打嚟做乜～
–
👉🏻即睇其他診所低能奇觀嘅文章
我叫珍寶豬，係一個診所助護，只係一個無能無專業資格無牌照的大嬸。做過晒港九新界中西醫診所，見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事，但請勿公開任何病人個人資料或病人相片。看此PAGE時請勿對號入座，信則有，不信則無。