10個男人10個都鹹濕㗎喇,靚女梗係人人鍾意啦,不過嗲精就唔係人人頂得住,特別係明明唔靚,又唔知哪來的自信覺得自己係女神嘅嗲精。
本人男,之前有個廿幾歲嘅女candidate嚟見工,佢真係由頭嗲到尾,其實喺見工呢啲場合嗲人好咩?Interview第一句佢就話:「你噚日打嚟通知我interview把聲好好聽呀,有冇人話你把聲好磁性?」
我:「冇。」
嗲精:「搞錯呀,你身邊啲人唔識貨,你件Polo隻色好靚呀~」
我:「呢件bossini買,有幾靚?逢星期五我哋公司casual wear,好喇,講返正題先,你之前份工做咗5年喎。」
嗲精:「梗係啦,我好長情㗎。」
嘩,我真係頂唔順呢條女,嗱嗱聲見完即刻pass畀line manager見,由於line manager係女人,更加唔受呢套,佢見完之後都同我講麻麻地,不過仲有幾個candidate陸續見緊,所以希望公平啲,見晒先決定請邊個。
隔咗個weekend,星期一我收到嗲精電話,佢照住我約佢interview個number打嚟,我以為嗲精想問result啦,點知佢話:「唔係呀,我想提你飲水呀,你今日有冇飲水呀?」
我:「飲水?」
嗲精:「係呀,你以為我想問interview有冇follow up呀?」
我:「哦,未有update,仲有幾個candidate要見埋先知。」
嗲精:「咁你有冇飲水啫?要飲多啲水呀知唔知?」
我:「得㗎喇,有心。」
嗲精:「你唔乖乖地飲水,我就訂啲水送去你公司㗎喇,咁好啦,如果有消息記得通知我喎。」講到尾咪又係講份工。
仲未完呀!之後幾日佢都keep住打嚟,真係好難頂,文字形容佢嘅嗲聲嗲氣,如果你遇過啲好嗲嘅女仔就會明。
佢次次都用「有冇飲水」做開場白,最後就索料問其他上嚟嘅candidate大唔大機會。
嗲精:「其他求職者都係女仔呀?靚唔靚㗎?你覺得我靚定佢哋靚呀?」
我:「下?」
嗲精:「你想唔想同我做同事先?你應該截住其他CV吖嘛,或者淨係畀啲好奇怪嘅人嚟見,咁line manager咪會揀我囉!」
我:「點可以咁㗎?」
嗲精:「哈哈,講笑咋!你唔係聽唔出呀?哈哈,你頭先個反應好cute呀~」
收皮啦!好肉酸呀!我知你想點,嗲下嗲下,flirt下flirt下,想我做兵幫你增加見成份工嘅機會吖嘛,你諗多咗喇,我冇呢個能力,最終決定權唔喺我手,而且我都有自知之明嘅,唔會好似公園阿伯畀娜娜嗲兩嗲就喪失理智。
Line manager最終揀咗另一位candidate,Yeah!一天都光晒!然後我又收到嗲精電話,佢最少一日打嚟一次,可能唔止,因為我成日行開行埋做interview,好多時候唔喺位。
嗲精:「點呀,今日做嘢辛唔辛苦呀?有冇聽話飲水先?」
我:「飲咗喇!啱啱都想打畀你,我哋請咗人喇,希望將來有機會再合作啦,你搵工加油!」
嗲精:「靚女嚟㗎?」
我:「男仔嚟㗎!」
嗲精:「點解呀?你唔鍾意我嚟做咩?」
我:「Line manager決定㗎!好啦,我做嘢先喇,加油,你都記得飲水呀!Bye Bye!」
自從嗰次同佢講請咗人之後,嗲精就冇再打電話嚟叫我飲水喇,做咩呀?公司唔請你,我就唔使飲水呀?咁現實嘅?
投稿:我不是Happy伯
=====
🧐 錯嘅Interview方法千祈唔好學
《見工花式跳崖系列》
https://hkofficedaily.com/?p=12413