見工花式自殺系列

好多candidate分享過見工不愉快經驗,我都做過求職者,點會未吃過苦頭吖,不過公平啲講,interview始終係雙向,HR年中都遇唔少嘔血candidate㗎,以下呢啲花式自殺案例分享,記得要用嚟借鏡。


資料來源:我上一間headhunt公司嘅同事 

事發經過:

我同事係負責IT recruitment,一般從事IT嘅朋友仔都比較內向少少,呢樣佢都慣咗,亦唔覺得有咩大問題,直至有一次……

「頭先我叫個candidate用英文介紹下自己,佢粒聲都唔出,又唔應我,跟住拎部電話出嚟,耷低頭係咁撳。」

我:「係咪有重要message要覆咋?」

「最初都以為係,心諗佢可能想覆埋個message之類,咁咪等下囉,點知佢撳完一輪就擺部電話喺枱面,見佢loop到有一堆英文嘅地方就停低,原來係照稿讀,我估係朋友WhatsApp send定畀佢,跟住終於開聲~~~My name is Jason, and I’m a recent computer science graduate from……我同佢講,見headhunt咁樣讀稿唔緊要,但真係去見工就唔好喇,就算份工唔係經headhunt介紹,係自己搵返嚟嘅都唔應該咁樣,拎部電話出嚟照稿讀Self-Introduction唔係辦法,我寧願佢花少少時間死背。」

個人心得:

其實英文唔好係有得練,最重要係對自己有信心,唔好怯咗講英文。先唔好理HR中途會唔會打斷你,呢啲預計唔到,基本嘅英文自我介紹頂盡咪背熟佢囉,講到尾都係千篇一律㗎啫,寧願介紹得平淡啲,簡單啲,都總好過拎部電話出嚟讀稿。


資料來源:我自己做In House HR嘅時候

事發經過:

超級勁煙味!我相信當日嗰位candidate係連隊幾支煙先上嚟interview。坦白講,食煙係個人自由,我嗰份工亦冇講明要請非吸煙人士,但係見工嘅meeting room大極都有個譜,成身煙味一定聞得到!我當啲HR或者headhunt自己都係煙剷,咁都唔代表佢哋鍾意同一個好大煙味嘅人困住喺間meeting room。

個人心得:

乖啦!下次真係忍唔住,早少少食一支,等啲味散晒先,食煙嘅人自己以為冇味,其實上到人哋公司會好覺㗎,忍一忍喇。再唔係咪interview完咗再煲囉,到時話知你食成包,或者一次過上香咁點10支啦!


資料來源:我自己做headhunt嘅時候 

又係Self-Introduction環節,我叫對方用英文介紹下自己,個candidate講:「Eric,唔使咁緊張,定啲嚟。」

我:「下,我唔係叫Eric。」

Candidate:「我知我知,我先係Eric(佢CV冇寫英文名),我叫自己唔好咁緊張,幫自己打打氣咋。」

我:「喔……」

個人心得:

Eric,唔使咁緊張,定啲嚟。


執筆之時淨係諗到咁多,第日醒起再同大家分享,至於fb嗰段山寨品牌見工經歷,朋友同HR講:「我見MUJI同UNIQLO啲product每次出咗冇耐,你哋就會做返件一模一樣嘅,勁快囉!仲要平過佢哋,我阿媽都好鍾意買你哋啲嘢㗎!老人家邊間平就買邊間吖嘛。」

HR面色一沉,然後再無下文。

即係咁,我冇理由怪佢講大話,搵食啫,又唔使埋沒良心去討好嘅,不過就崩口人忌崩口碗囉,下次避重就輕啦!

error: