有日一位小姐嚟到診所。
佢行埋嚟登記處講：「我要同你影張相呀」
好驚喎！唔通我被發現秘撈？我要保持鎮定！只要死口唔認佢都吹我唔漲！
我：「ER…請問有咩事呢？」
佢：「我要交功課俾我老細」
你老細又唔係我老細，點解我要啋你老細？
我：「唔好意思，診所唔俾影相嘅」
佢：「我唔駛影診所呀，淨係同你影就得啦」
點解唔搵醫生影？
我：「你係咪唔舒服要睇醫生呀？你老闆應該係要病假紙呀？唔係要同我影相呀？」
佢：「係要同你哋影相呀，假紙都一樣要呀」
佢拎起電話，鏡頭對住我講：「我影啦，笑呀」
笑你燒鴨瀨咩，戴住口罩我笑到流口水都睇唔到啦你。
我是拒絕的，我低頭做嘢算。
佢：「你個頭呀」
我冇理佢。
佢轉用前置鏡頭，自己嘗試入埋鏡：「姑娘，望呢度呀，笑呀」
我低頭講：「你要睇醫生就俾身分證我登記啦」
佢：「姑娘，你可唔可以做個姑娘POSE呀？我怕老細當假呀」
請問咩嘢係姑娘POSE呀？
我：「小姐你要睇醫生就直接俾身分證我登記啦」
佢好大聲：「yes！係啦！我就係要呢啲」
屌，原來錄緊片…俾你陰到添。
佢滿意放低電話，放低身份證俾我。
我終於登到記。
入到醫生房佢同樣要醫生影相，醫生一直不要不要，小姐一直要要要，好煩。
就連出藥，佢都一直喺度影…
究竟邊間公司請個病假都咁麻L煩呀？
===
👉🏻即睇其他診所低能奇觀嘅文章
👉🏻《診所低能奇觀》 「你whatsapp係咩呀？」
https://hkofficedaily.com/?p=17344
我叫珍寶豬，係一個診所助護，只係一個無能無專業資格無牌照的大嬸。做過晒港九新界中西醫診所，見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事，但請勿公開任何病人個人資料或病人相片。看此PAGE時請勿對號入座，信則有，不信則無。