早輪有個新仔返工，由於佢帶咗飯盒，所以放lunch嘅時候引嚟幾個Old Seafood串佢。
Old Seafood一號：「第一日返工帶飯？咁唔合群嘅你。」
Old Seafood二號：「係喎，職場禮儀都唔識？擺返落雪櫃聽日先食啦，唔使驚喎，我哋唔會叫你請。」
仲有Old Seafood三號喺旁邊好似嘍囉咁附和。
呢個新仔都算係咁，笑笑口話下次先，佢唔識職場禮儀？你班Old Seafood就真係要學喇。
本身唔想理佢哋，但呢幾條屎忽鬼死唔斷氣，未停過係咁窒個新人，似乎想用群眾壓力迫佢出去一齊食lunch。
我嘗試幫新仔解圍：「又唔係打麻雀，你哋食飯唔使湊夠4隻腳喎。」
Old Seafood三號：「我哋教佢人情世故呀！」
我哋阿ger（Team Manager）突然行埋嚟好惡咁講咗句：「走啦！一定要同你班柒頭食㗎？」
幾個Old Seafood即時鳥獸散，真係欺善怕惡，不過話時話，阿ger你又唔使咁凶狠嘅，Old Seafood唔敢嬲你，一陣走去嬲個新仔，佢哋個格就係咁衰！
原來呢個新仔返工係有段古，本身阿ger請另一個人，但係返工前一日，嗰個人打嚟話turn down offer，阿ger就臨急臨忙搵心目中嘅二號人選，結果佢打畀呢個新仔，問佢可唔可以第二日返工，新仔好開心答應，因為佢之前失業咗兩個月，又唔敢同屋企人講，結果日日扮返工出去「遊蕩」，有啲人嘅屋企真係咁㗎，仔女搵唔到工已經夠傍偟，但係最大嘅壓力反而係嚟自家人。
重點係新仔嘅媽咪日日整飯盒畀佢，做戲做全套，佢一至五出去「遊蕩」不特止，仲要拎埋個飯盒喺身，我問佢去邊度叮飯，佢話去7仔，原來好多屋苑嘅看更保安都會拎飯盒去7仔叮。
聽完覺得有啲心酸，而家總算搵到份工，雖然係另一個candidate臨時唔返先至補上，但起碼有間公司可以落腳。
由於阿ger係前一日下晝5點幾先打畀新仔，所以新仔想叫阿媽唔好整飯盒都嚟唔切，啲阿媽好早買餸😂佢都知第一日返工就帶飯可能會畀同事話，仲同我哋講咗幾次唔好意思。
阿ger聽完又講：「唔使唔好意思，一定要同嗰班柒頭食㗎咩？唔使理佢哋。」
其實帶飯未必係唔識人情世故 ，亦唔一定係冇錢，每個人帶飯都有自己嘅原因，阿ger自己都帶飯，因為佢之前身體有啲事，所以佢老婆會特別跟餐單準備。
我自己就係想用lunch hour追劇，好怕出去迫。至於嗰幾個Old Seafood就好鍾意聯群結黨食lunch講是非，公司有好多同事都怕咗佢哋，自己出去食飯都唔會join Old Seafood班人，話不投機半句多。
正如阿ger話齋：「一定要同你班柒頭食㗎咩？」
投稿人： Billy 仔
＝＝＝＝＝
🍴🍚 講開帶飯，呢單始終係最嬲
《口痕友多次取笑飯盒寒酸，同事忍無可忍爆粗還擊》
https://hkofficedaily.com/?p=13025