有日一對情侶嚟到診所。
佢哋行到嚟登記處，女嘅神情有啲怪怪哋。
男嘅放低張身分證喺枱面：「姑娘，同佢登記呀」
女望住張身分證有啲依依不捨嘅感覺。
我：「好呀」
女問男：「真係要睇呀？」
男：「你唔好又話唔睇啦」
女：「我都唔覺有問題」
男：「你唔覺有問題呢個先係大問題」
好有慧根嘅對話啊。
女：「唔好啦，點開口同醫生講呀」
男：「我都唔介意，我講囉」
女：「你唔介意我介意呀嘛，我都話我唔覺有問題囉」
男：「你唔睇我點做落去呀」
我把口唔小心跌咗個『吓』字出嚟，sorry，打擾晒。
女同男靜咗。
我：「登記好啦，你哋坐低等嗌名呀」
女望望我，再同男朋友講：「我哋問咗姑娘先好冇？問咗佢意見先好冇？」
問我冇用啊，我淨係可以答你一陣食晏食啲咩，因為我諗好啦，就星米啦！
男：「佢唔係醫生，佢係醫生就唔駛坐喺度啦，你問佢做咩呢？你唔好又話唔睇呀，拖咗好耐啦」
我輕輕點頭表示同意，係呀係呀，你唔好登記完就走呀，醫生會話我又趕客呀。
女：「你都要尊重姑娘意見呀」
多謝你呀，你只要入去醫生房順利睇完醫生順利拎藥俾錢就係對我嘅尊重啦。
女：「姑娘，你有冇試過放屁用咗前面放呀」
…當住咁多人面，我點答你呀。
我：「你有咩唔舒服不如同醫生講啦」
女：「你答我啦」
我：「唔好意思，我唔想答呀」
女：「唔想答即係有啦，你有冇試過用咗前面放之後嗰陣味留咗喺嗰度呀？」
男搶答：「關咩事呀，係關個屁事嘅轉頭都冇事啦，再退後一萬步講沖完涼咩味都冇啦」
女：「姑娘，你答我啦」
我：「不如一陣入房同醫生講啦…」
女：「姑娘你答我啦，一係你話俾佢（指男朋友）知，冇一個女人嗰度係會香囉」
女再講：「我唔係唔香囉，係真係放屁放咗喺前面先有嗰啲味咋」
男嘅擰晒頭翻晒白眼，女嘅快步離開咗診所。
醫生，真係唔關我事呀…
👉🏻《診所低能奇觀》「我唔係諗住自己食呀，我俾我隻狗食咋」
https://hkofficedaily.com/?p=18628
我叫珍寶豬，係一個診所助護，只係一個無能無專業資格無牌照的大嬸。做過晒港九新界中西醫診所，見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事，但請勿公開任何病人個人資料或病人相片。看此PAGE時請勿對號入座，信則有，不信則無。