我冇做headhunt幾年喇，當日quit並唔係有咩驚天動地嘅原因，純粹係搵唔到錢，喺度必須強調，係我廢啫，呢行大把人搵到錢。
嗰陣入行我冇headhunt經驗，底薪開價$14,000 – $15,000，結果畀人壓到得$12,500，仲記得in我嗰個阿姐話：「你唔應該focus喺basic salary，做我哋呢行應該睇生意，有生意自然就有Commission，呀仔，明唔明白呀？」
我幾時多咗個呀媽？
咁佢又唔係完全冇道理嘅，何況我當時畢業冇耐，只係一個職場新鮮人，又對recruitment呢行好有興趣，當係攞經驗都好吖，最重要係嗰陣冇其他offer吖嘛！
試用期頭三個月，嚴格嚟講我仲未係一個headhunt，因為初期係負責做research嘅工作，即係幫其他資深嘅同事搵適合嘅CV，冇機會接觸啲客，所以頭三個月都係逗份底薪，返工要過海，香港區食飯又偏貴，仲有其他使費同埋比家用，$12,500真係有啲吃力。
過咗試用期之後，我叫做正正式式成為recruiter，但有啲job始終要「煲」，要擺時間搵人、安排interview、等結果，好多時又中空寶食白果呢！而且就算個客請我啲candidate，好多candidate都唔係即刻返得工，可能要一個月通知，然後……頭5個月我都係出底薪$12,500，Commission呢樣嘢距離我好遠。
Headhunt呢行每日要見好多candidate，有時甚至要client visit，個個都著套靚西裝返工，但其實有好多人都係褲穿窿，甚至試過有同事問我借錢，唔係借得多，借$100，就係因為$100都要借，個感覺先至特別淒涼，出去求其打份文職工都冇咁可憐。
不過又唔好以為做呢行搵唔到錢，賺到盤滿砵滿甚至買樓置業嘅大有人在，一來人哋真係勁，我真係渣，二來作為新人，大銀碼同埋有potential嘅job排隊都未輪到我。
我哋headhunt公司出commission係「跳bar制」，5萬蚊起跳，超過10萬蚊，commission嘅比例又會再多啲，然後20萬又會再多，如此類推，咁5萬、10萬、20萬係點計出嚟呢？舉例我幫客人請到一個6萬蚊嘅position，13個月糧，呢隻job嘅年薪即係78萬，我公司收12% commission，即係呢隻job會為headhunt公司進帳$93,600，而我份commission就係喺$93,600裡面再拆一個percentage，留意返吖，因為有「跳bar制」，做5萬又係唔過10萬，做9萬幾又係唔過10萬，即係我仲出緊最低分成嘅佣金，落我袋大約係萬零蚊，加埋底薪$12,500，total都係出2萬幾蚊糧。（編按：間間headhunt公司嘅佣金計法都會有所不同）
應該有好多人會問，咁你都做到9萬幾生意啦，點解唔做多少少？做多一隻job咪跳bar上10萬囉！鬼唔知咩，做到先得㗎，請人唔係sell件衫，個客唔請就係唔請，嗰個月累積唔到上去都冇辦法。
我叻仔呀，入職第六個月唔知搞咩好旺，當月做到40幾萬生意，主要係一間大國企幫我請咗兩個senior level嘅人，commission有幾萬蚊，即刻對headhunt呢份工重燃希望，直頭覺得自己可以攞傑青，不過……我公司嘅規矩係個客一日未找數，我份佣都未有得出。
嗰間國企拖數賴皮，結果我作為headhunt都要兼任會計打去追數，對方唔找數嘅理由包括：
「我哋一般係90日數期㗎喎！」
🙄💭（ 屌你啦！一開始簽quotation返嚟，其實你已經agree咗candidate返工後要找數，佢哋係完全無視合約同埋承諾。）
「催咗㗎喇，會計未得閒開票。」
🙄💭（開張票啫，幾個月喇，開個演唱會都籌備完啦，你公司張票係咪歡樂滿東華嗰種巨型大支票呀？）
「張票要等老細簽名呀！」
🙄💭（你老細冬眠呀？簽咗幾個月都未簽到個名？佢隻手不舉㗎？）
以上唔找數嘅藉口重重複複，直至半年後我resign唔做，呢間國企都係未找數，咁唔找數會點呀？咪冇commission出囉，公司規矩係離職就等於放棄客人未找數嘅commission，你話係咪好荒謬？結果我喺呢間headhunt公司做咗一年，得一個月係收到幾千蚊佣，其餘11個月都係出底薪$12,500，咁你明白我點解唔再做headhunt啦！
其實headhunt開一張單，個人實力好重要，運氣亦都好重要，開到單做到生意，仲會受到公司規矩約束，個客唔找數又冇佣出，我頂唔順喇！呢行有好多舊人賺到錢，但每日亦有好多新人離場，流失率極高，中間個斷層好大，當年同期入職嘅幾位同事都先後quit咗，多少有啲唏噓，不過而家唔使跑數，冇咁大壓力，的確開心過之前嘅，當賺個經驗囉！
投稿讀者：Bernard