朝早9點半收到同事WhatsApp：「幾時返到呀？」
我：「咩事？老細搵我？」
同事：「唔係啦，老細邊有咁早返呀？公司有新女返工，勁索！」
我：「戴晒口罩你又知人哋索？」
同事：「正話喺pantry見到佢除口罩飲水呀，睇樣應該得廿幾歲！」
我：「邊個部門？而家跑返嚟！」
點知我返嚟真係睇唔到，因為已經走咗，佢唔隸屬於任何部門，呢個「新女」係做清潔。
我哋office嘅清潔係外判，佢哋有一批阿姐，承包咗同一棟商業大廈嘅部分office清潔工作，然後嗰朝有個後生女喺我哋office抹枱倒垃圾，仲有另外一個阿姐吸塵。
佢哋嘅外判清潔工作大約8:30至8:45就開始，唔會超過9:15走，原因係曾經有同事投訴吸塵好嘈阻住call客，所以外判清潔公司特登安排早少少搞掂我哋office先。
朝早同我報料嗰位同事出名係喇叭嘴，有後生女嚟做清潔呢單嘢唔使一個上晝已經通晒天。我哋office好少同事咁乖搭正9點返工，除咗receptionist返8點半之外，得3分1人會準時9點返工，其他同事一般返9:30至10:00，但聽到有個「清潔阿姐」又靚又後生之後，第二日啲同事個個搭正9點返嚟，男嘅當然係𥄫女，女嘅就想睇下有冇靚得咁誇張，而轉死性返9點嘅仲包括我🤣
講真「靚」呢樣嘢各花入各眼，我都係本住平常心望下，費事咁out啦，全office都討論緊一個「清潔阿姐」，喺度做又點可以見都未見過呢！第二日準時返嚟，我一眼就認出「目標人物」，因為從佢個髮型、耳環同埋生硬嘅抹枱方式，都同「清潔阿姐」呢4隻字大纜扯唔埋，最頂癮係平時返開11點嘅老細都「聞風而至」，佢話聽到秘書提及個「清潔阿姐」好靚，特登9點返嚟見識下喎！
老細個格不嬲係百彈齋主，通常你講A，佢硬係要話B，包拗頸，明明係好，佢都要話麻麻，個死人格係唔鍾意認同人，唔鍾意讚美人。佢都算鬼馬，平時明明叫秘書幫佢買咖啡，嗰日朝早特登拎晒咖啡壺、filter同個磨咖啡豆嘅機入pantry玩咗半粒鐘，原來就係為咗等新女入嚟除罩……飲水！
嗱，公平啲講，除咗第一日有個別同事見過呢位美少女嘅廬山真面目之外，其他人包括我都係未見過佢除罩個樣，評論有冇偏頗真係不得而知，但年紀、身型，仲有嗰上半part面就真係超晒班。
老細見完個呢位「清潔阿姐」嘅上半part面都話好靚，佢仲講：「咁靚使咩做清潔呀，去選美都得啦！Viu係咪有個女團？可唔可以提名？」其實唔應該叫「清潔阿姐」，因為人哋真係得廿幾歲，以下叫返佢做「清潔美少女」。
成班狗公觀望咗幾日（係呀係呀包括我），呢位外判清潔美少女好有禮貌，逢人都講早晨又點頭，不過應對方面都係一句起兩句止，弊喇弊喇，角色係一個清潔，內裡又不食人間煙火咁，個package神祕又美麗，真係搞唔掂喎！結果有個男同事膽粗粗想出招，旁敲側擊諗住向另一位清潔阿姐套料，跟住先知呀美少女係其中一位阿姐個女，之前做空姐，咁你都知航空業發生咩事啦，純粹搵工冇著落走嚟客串做part-time.
好可惜，清潔美少女只係做得幾日，然後就話搵到新工喇，後來連老細都覺得「揼春」，佢話早知請呢個女仔返嚟office喎！
最現實係清潔美少女冇再嚟之後，有幾個男同事係咁巴結人哋阿媽（即係其中一個清潔阿姐），走去同人哋阿媽吹水，問人食早餐未，又叫人張枱唔使抹咁乾淨，真係聽到都想作嘔。
其實office嗰幾日有個靚女做清潔係醒神嘅，問題係咁好條件又咁後生，都預咗唔會做得耐啦，個畫面太違和喇，唔知美少女家陣撈咩呢？
投稿讀者：Alfred