電話響起～
我：「你好，乜乜診所」
對方係一位女士：「喂？診所？我之前喺度睇過幾次呀」
我：「係，請問有咩事？」
佢：「你幫我CHECK吓我之前食過嘅係咩藥呀」
我：「你俾你嘅身分證號碼我，我睇睇你排版先呀」
佢：「XXXXXX」
我：「小姐我睇返你嘅紀錄，最近一次嘅藥都已經係半年前啦喎，隔咁耐嘅藥就唔好要啦，一係你嚟睇醫生啦」
佢：「我唔係諗住自己食呀，我俾我隻狗食咋，佢應該唔舒服呀」
…你玩嘢嗎？
我：「人同寵物嘅藥唔同呀，有啲人食嘅藥係絕對唔可以俾寵物食呀，你帶佢去睇獸醫啦」
佢：「唔駛咁緊張喎你，食一兩次咋嘛」
我：「有啲藥對佢哋嚟講食一次足以致命呀，我呢度真係冇嘢幫到你，麻煩你同佢去睇獸醫」
佢：「喂？唔好收線住呀，我問埋呢樣得啦，你嗰隻止痛可唔可以食呀？」
我：「唔可以，醫生開俾你嘅藥淨係俾你食嘅啫，唔係俾其他人或者其他動物食，就算係人都有機會藥物敏感或者食唔同嘅份量，你係唔可以將自己嘅藥隨便俾人食」
佢：「你幫我睇吓食止痛食唔食得啦」
我真係想講佛講到你上西天。
我：「小姐，如果你自己唔舒服嘅就你嚟睇醫生，你啲藥已經係半年前，我都講咗已經隔咗咁耐唔好再食…如果你仲係堅持自己俾藥隻狗食嘅，你應該去問獸醫，我唔知動物可以食咩藥或者唔應該食咩藥，因為醫動物嘅係獸醫嘅專業。你俾藥佢食都係想佢好啫，如果你今日自己俾咗一啲唔應該俾佢食嘅藥，佢因為咁死你都唔安樂啦。你不如正正經經同佢去睇獸醫啦。」
佢：「我邊有唔正經呀」
嘟。佢CUT咗我線。
你好正經咁唔用腦嘛。
👉🏻《診所低能奇觀》「可唔可以唔好哄咁埋嚟睇呀？」
https://hkofficedaily.com/?p=15750
我叫珍寶豬，係一個診所助護，只係一個無能無專業資格無牌照的大嬸。做過晒港九新界中西醫診所，見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事，但請勿公開任何病人個人資料或病人相片。看此PAGE時請勿對號入座，信則有，不信則無。