噚日見到一個IG Story，內容係講某醫院嘅企業傳訊部，裡面每個同事頭頂都有一部CCTV，有傳聞之後仲變咗每人頭頂兩部cam影住，長期有人喺房睇mon監察同事一舉一動。
我冇做過嗰間醫院，但係對於CCTV監察員工呢樣嘢，個人感受都好深刻。
幾年前我喺屯門某個二三線商場搵到份暑期工，係一間賣衫嘅boutique，細細嘅舖面竟然裝咗9部CCTV，呢9個cam唔係用嚟捉賊，而係用嚟監視我哋啲Sales。
老闆娘係普通中年女人，其貌不揚聲大大嗰種，有貨到佢先會落嚟點貨，平時就唔會落舖頭，不過人唔喺度咋，老闆娘係與我哋常在㗎！
我唔知9部CCTV係駁去佢手機定係屋企，只知道老闆娘真係當煲劇咁睇，首先舖頭嘅Sales係唔可以坐，佢要睇實你有冇坐，一坐就打落舖頭鬧你。呢樣我冇乜投訴，因為一般做Retail都冇得坐，無論係大型連鎖舖定係boutique仔。
其次係半個鐘食飯，唔畀出去食，我哋Sales要縮埋去收銀機後面個corner仔食，一有客人入嚟，就要放低個飯盒出去招呼，你出慢半步，老闆娘又會打落舖頭，你話佢唔係時時刻刻睇住CCTV監控員工都冇人信。
另外，Sales唔可以企埋一齊傾計，當時我同另一位Sales被指示要企到好開，我哋唯有眼神望住門口，完全唔望對方咁樣傾計，其實一個工作環境裡面，同事傾計交流有幾咁閒呀？不過你唔好理，只要老闆娘喺CCTV見到Sales企埋傾計，就會第一時間打落舖頭鬧。
去廁所同埋去銀行入數先至最癲，話就話屯門二三線商場啫，女廁好多時都要等㗎，由舖頭行過去都要時間啦，5分鐘內返唔到舖頭，老闆娘又會打落嚟，大家都係女人，咁都唔明白，咁都唔體諒。去銀行幫佢入數又係咁，間間銀行都要排隊㗎啦！
用9部CCTV監控我哋，要操縱埋員工食飯模式、傾計模式、去廁所時間，呢個老闆娘係一個不折不扣嘅控制狂。
當時我其實唔係咁鍾意讀書，一直好想快啲出嚟社會做嘢，但呢份暑期工啟發咗我，令我知道學歷同知識好重要，你讀多啲書唔代表可以避開衰公司同埋衰老細，嗰間醫院嘅員工唔會低學歷啦，醫院個名夠響夠大喇啩，咪有一樣有監控狂上司！冇錯！關鍵係你自己有籌碼，必要時有得揀，轉工都容易啲，所以人哋話嗰間醫院日日登job ad，長期請緊人，就係因為班員工唔會做得長，唔會幫佢賣命，雖然話公司請人係一雞死一雞鳴，總有人入去做接火棒，不過間公司個名咁臭，有留意嘅人都知你長期登招聘廣告，正常人都唔apply啦！
用人不疑，疑人不用，舖頭有錢銀交易，裝CCTV無可厚非，但個老闆娘嘅用途係捉員工食飯傾計去廁所呢啲事，咁就偏離咗原意喇，打份工啫，唔使控制埋人哋嘅一舉一動嘅。
投稿讀者：不公開名字