係咪男人嘅世界都會有呢啲情況出現？
幾個玩得埋嘅同事成日講笑，耐唔耐會send啲不雅照去group chat度，嗰啲照片全部都好露骨，甚至係～～～張開你的，Heart Heart Heart，交出我的～～～你哋後生未聽過㗎喇，呢隻係邱淑貞嘅赤裸的羔羊。（聶瞳編按：呢隻歌叫《赤裸我思緒》，赤裸羔羊係個戲名，我未聽過，都未睇過，校對時google咗一下）
有次喺梳化睇電視，電話有msg咪拎嚟睇囉，一打開已經知瀨嘢，成個裸女坦蕩蕩，老婆坐我旁邊見到，即刻成個醒晒，彈起身問我係邊個嚟？
「Calvin send嚟咋！」
「我問你條女係邊個嚟呀！」
「點知邊個啫，佢哋唔知喺邊度搵啲圖send嚟咋！」
「你唔係咁變態呀？」
「我唔識㗎呢條女！」話口未完，班死仔又send另一堆圖過嚟，唉。
老婆當時已經搶咗我部電話嚟睇，仲檢閱返之前佢哋send嚟啲相，每睇一張都講一次：「我真係睇你唔起……」
不過最難堪唔係呢次，係另一次同個客出去商場做嘢，我份工係要睇佈置之類，搞到咁上下就要影低啲相返去follow，然後個客話：「咦，你影呀，咁我唔影喇，你過畀我吖。」
「冇問題啦，我AirDrop畀你啦，唔會縮圖吖嘛！」
我哋一齊睇返頭先影嘅相，右手食指連掃幾張之後，出現咗一個冇著衫嘅女人攬住個男人，我自己都嚇一嚇，個客對眼就嚟跌出嚟咁滯。
「Sorry，啲同事成日玩嘢！」
「唔緊要，大家男人，明㗎喇。」個客嘅表情同眼神係非常睇唔起我，睇得出佢係鄙視我。
離開咗個客之後，即刻喺group chat鬧爆班死仔，但冇人可憐我，佢哋話可以選擇「永不自動下載圖片」，早講吖嘛，我成部電話嘅相簿都係咸相。
不如我解釋下點解老婆唔係嬲我，而係睇我唔起，又點解個客嘅眼神係鄙視我吖。
呢班死仔send嚟嘅咸相，唔係三上悠亞同波多野結衣嗰類，佢哋係專揀啲大膽得嚟又好騎呢嘅咸相，原意係一齊笑下，例如我老婆見到嗰個「collection」，就係有個裸女舉高雙手，focus格勒底毛，連續幾張係格勒底毛特寫，啲裸女嘅樣係三尖八角，成部坦克車咁，佢哋平時就係send呢啲相過嚟，正正經經嘅咸照係一張都冇，你明我老婆點解話我變態啦！
至於喺商場做嘢嗰次，班死仔係send咗堆六十路系列過嚟，張相我到而家仲記得好清楚，係一個阿婆全裸攬住個後生仔，咁你明點解個客睇我唔起啦！
即係我唔介意佢哋send咸相過嚟呀，但唔好send呢啲吖嘛，唔係個個都get到笑點㗎，老婆到而家都仲覺得我對格勒底毛情有獨鍾，又問係咪佢脫咗毛之後冇咁愛佢。
投稿讀者：邱淑貞fans