我同意有論調指出，Signal唔收集你資料，唔賣廣告，咁燈油火蠟邊個畀？
遲啲Signal可能都會改變，到時有機會集體炒車，老生常談嘅一句說話：「免費嘅嘢，通常係最貴。」但係WhatsApp帶畀我嘅生活壓力好大，佢最仆街係～～～您是無法隱藏 “在線” 或 “輸入中” 的狀態。
呢度應該有讀者朋友同埋工作夥伴有我電話號碼，你哋都WhatsApp過我，應該知我係好耐先覆msg，有時隔咗成日，group就更少參與，因為太多message會令我有種恐懼同埋壓力。
多msg係無可避免，問題係：「哦，你online又扮睇唔到，冇禮貌。」
每次進入WhatsApp介面，我哋都會被顯示為online，因為佢嘅條款寫得好清楚～～～您是無法隱藏 “在線”有時只係想入去摷返同客嘅對話，因為要搵返啲brief或者link去工作，畀其他人見到你”在線”又唔覆，自己都唔好意思。
有時我唔想傾公事，只想同朋友傾計，但係個客問你嘢，畀佢見到”在線”又唔覆，大家都失落。我唔係扮睇唔到或者冇禮貌，但係作為一個人，係需要空間同時間唞氣，WhatsApp點解要迫到人赤裸裸地顯示online呢？係咪我哋唔可以擁有私隱？
您是無法隱藏 “在線” 或 “輸入中” 的狀態。～～～如無意外，WhatsApp嘅開發人員同高層都係心理變態，可能下屬平時唔覆佢哋msg，可能係另一半偷食唔覆msg，所以佢一定要畀人知你係咪on緊line。
香港人已經好大壓力，就算唔計咩賣資料嘅問題，其實一早都唔應該用WhatsApp，我唔知Signal會唔會有一日炒車，不過今次的確係大規模嘅移民潮，亦係扭轉WhatsApp喺市場獨大嘅最佳時機，呢個唔係跟風問題，而係根本唔應該畀WhatsApp搞到壓力大增。
我哋值得擁有自己嘅生活。