早幾晚家母煮啲餸好正，我即刻用電話幫啲食物影沙龍，然後阿媽嘈住要睇下影成點，我唯有開電話相簿畀佢慢慢鑑賞，碌碌下佢大叫：「哎呀，唔好再影啲咁嘅相喇，大吉利是呀！」
嗰張相，係我女友瞓著咗嘅樣，有著衫嘅，絕對唔係裸照，純粹係瞓到好似跌落山崖再擘大個口嘅醜態，因為有時佢嚟我度過夜，如果第二朝起身早過我，佢都會係咁同我影大特寫，個樣唔衰都唔影，所以我哋互相有大家瞓到勁Kai嘅相。
家中兩老好恩愛，佢兩個以前都有互影，我老豆有時瞓到好似去咗馬爾代夫度假咁，有時就流晒口水，你真係估唔到佢兩個加埋百幾歲都咁搞鬼。
有次老豆出差去新加坡一星期，阿媽冇份去又好掛住佢，跟住唔知痴咗邊條根走去post老豆一張瞓覺相，再打咗句caption：「老嘢，淨低我一個。」
有個以前同佢一齊上太極班嘅師奶隨即留言：「卿姐，人死不能復生，節哀順變。」
嗰個師奶唔係搞gag，佢係好認真地叫我阿媽節哀順變，我哋成班仔女笑到碌地，但係阿爸就嬲到噴火，即刻叫阿媽刪post，從此佢兩老就冇再影瞓覺Kai相喇。
阿媽：「快啲刪咗佢呀！大吉利是，一陣Kelly嬲你。」
冷靜啲卿姐，冇人叫你影完擺上網㗎嘛！
上一篇文章：9up男朋友乞唔乞人憎?