投稿讀者：Blanca
想講下我老細，佢真係一個思想家，諗到咩就話要做咩，見到人哋有noise又要跟風，不過我要講得清楚啲，老細齋諗㗎啫，跟手就會丟落去做死班員工。
咁老細一定唔會落手做㗎啦！有咩咁出奇啫？聽埋你就會明。上年12月頭，有個vendor寄月曆畀我哋公司，老細好似觸電咁震撼：「係喎！點解我哋唔整月曆送畀客？即刻quote價吖。」
有同事話：「12月頭喇喎，人哋一早準備先趕得切寄出，而家又要design，又要搵廠印，邊趕得切呀？」
老細：「點會趕唔切啫，design要幾耐呀？叫人事部請個freelance designer一兩日搞掂啦！報紙印十幾萬份咪又係一晚印完。」
哦，原來中間冇過程，design有手有腳就做得，印埋都係一晚。同事走去quote印刷同Design費用，好多間都表明年底前趕唔切，搞搞下，老細又話唔印lu～～～
上年口罩缺貨，我老細話要買啲機返嚟生產口罩…講緊生產口罩喎！
同事：「老細，我哋唔係做開呢啲，唔識㗎喎！」
老細：「你唔使識㗎，機器識咪得囉，search下廠商先啦！」
好啦！Search啦！本身已經唔容易搵，搞一大爛餐搵到啲機器報價之後，老細話：「嘩，咁貴？由佢啦，呢水都過晒喇。」
我哋公司有個fb page，老細話想計下開業3年後有邊啲人like過，想叫佢哋做member，會送禮物出去，雖然我哋公司平時出post唔算多人like，但係3年以嚟嘅post逐個逐個摷返再mark低？你有冇病呀？
早排有單嘢好在HR夠醒，因為老細屎忽突然又痕，話要整個App喎，叫人事部出job ad請人，仲要係請3個，目標個App半年內出街，講到就嚟要統治地球咁款，咁HR就出ad啦，人都見晒㗎喇，但老細未有再進一步嘅具體plan，你請人返嚟，咁電腦呢？仲有其他細節呢？老細話叫咗幾個新人返工先，再慢慢開會，想到時有啲專業人士坐埋一齊傾，總之叫HR即刻出offer。隔咗兩日之後，老細話：「同佢哋講農曆新年後先返工啦都係，新年前應該搞唔切。」
HR嬲到塊面紅晒，但佢醒呀，太熟悉老細講就天下無敵嘅性格，所以根本未正式打去比幾個candidate confirm offer，如果佢一早咁做，到時啲candidate放棄咗其他offer甚至辭咗職，新年前嗰個月咪變相冇收入？更何況新年後老細有冇變卦都唔知，真係差啲害死人。
而家咪宣布咗新年取消花市嘅？老細話想開一檔網上賣花，到時將啲桔同埋桃花轉online喎！
同事：「老細，網上賣花唔係唔得，不過我哋唔係做開呢啲喎，都唔識。」
老細：「點樣唔識呀？你有冇行過花市吖？」
有一個天馬行空嘅老細真係慘過食屎，永遠做死班員工，因為佢根本唔係落場嗰個，完全唔明白當中有咩難度，亦唔知道真正要用幾多時間，齋講唔做梗係咩都容易啦，知唔知下面班人會做到抑鬱㗎！
我已經開始搵緊工喇，嚟緊仲有interview，雖然就快到新年，轉工似乎唔明朗，不過都好希望半年內走到，祝我好運啦！