上年11月返咗呢份工之後見識到個奇人，因為佢喺公司總係神出鬼沒。話說Sales Team就喺我部門隔籬，個個Sales都係朝9晚6咁返工，由於疫情關係仲要停晒見客咁滯，但係有條友就好似鍾意返幾點就幾點，最低消費都11點先見人，有時食埋lunch先出現，3點放工都見過，做做下唔見咗人又見過。
啱啱入嚟做嘅時候唔方便太八卦，不過後來愈睇愈過癮，呢條友就算返到公司都係睇下馬經，玩下手機game（因為佢長期打橫部電話兩隻手係咁撳，所以幾明顯），再唔係就周圍撩女同事吹水，最鍾意撩receptionist，真係會企喺接待處傾半個鐘以上。
後來做落咗我就問同事：「嗰個男人邊個嚟㗎？好似鍾意返幾點就幾點咁嘅，仲要成份馬經攤開嚟睇。」
同事：「你講緊James？佢咁好數，基本上公司有7成生意都係佢搵返嚟，可能唔止，所以打橫行㗎！」
唔怪得啦，不過自出自入同來去如風都係碎料，有次我見到老細行埋去叫佢入房傾啲嘢，James全程玩手機一眼都冇望老細，淡淡然講咗句：「你過嚟傾啦，費事行嚟行去。」老細不單止冇發火，仲死死地氣去我哋部門拉走張櫈過去傾。
咁都未算惡，有次放lunch嘅時候，我、另一位同事，仲有老細喺度等緊電梯落樓，跟住James咁啱返嚟，一打開電梯門見到老細，James非常自然咁講咗句：「去邊呀粉腸？」
老細又真係答佢：「食晏呀，你去唔去吖！」
James：「去，都未食嘢，我擺低啲嘢先，你喺度等等我。」
老細：「得啦，等埋你。」如果我唔係呢間公司嘅職員，真係會以為James先係老細。
結果老細留喺原地等James，我就問一齊落樓嗰位同事：「頭先你聽唔聽到James叫老細做粉腸？」
同事：「成日都係咁㗎喎，可能我同你喺度咋，我聽過佢平時叫老細做L樣同仆街仔，咁當然唔係鬧人嗰隻語氣啦！」
我：「老細咁都忍得？係咪親戚嚟㗎？」
同事：「應該唔係親戚，只係James跑到數啫！佢嘅地位係超然㗎。每個星期老細同Sales Team開例會，James就算返到公司都唔會參與，佢話開會目的都係捽數，即係唔關佢事喎！」
我：「但係你唔覺得畀個員工叫自己做粉腸，仲要係兜口兜面咁叫，我同你兩個職員仔又喺度，老細會好冇面㗎喎！」
同事：「如果你搞生意，你做老細開公司，你寧願要錢定要面吖？」
我：「咁我梗係實際啲要錢啦！」
同事：「啲大客全部係James攞返嚟，個個自動波落單孭起公司起碼七成生意額，其實好多人都唔知我哋公司嘅老細係邊個，但一定知James係邊個。」
James喺度做咗6年，聽返同事講，佢之前惡到去桑拿揼骨都拎張單返嚟claim，同朋友食飯張單二三千蚊又claim，最初會計部嬲到紮紮跳，但老細話冇問題，呢個係James嘅特權。
據聞曾經有客拉攏James另起爐灶，不過佢嫌做老細好大壓力，覺得錢呢樣嘢夠使就得，唔想孭咁多嘢上身，如果有個Top Sales又返到數又冇離心，作為老細又真係幾爽既，難怪唔介意畀James兜口兜面叫佢做粉皮，可惜我嘅性格同口才都唔適合做Sales，冇能力食呢口飯，否則好似James咁樣做打工王帝的確唔錯。