「其實日本人個腦係咪裝屎㗎？啲日文亂柒咁嚟嘅？」呢句係出自我同事阿基把口，6年前大家一齊上日文堂佢已經係咁鬧，6年後嘅今日，佢依然鬧緊日文分平假名同片假名係多餘，濁音係多餘，拗音係多餘……
我6年前嚟咗而家呢間日資，當時公司喺香港開分部，一次過請咗幾位新人埋班，我就係其中一個，而阿基遲我幾日入職，由於公司唔太大，根本冇meeting room，個個見工嘅人都係埋去日本GM個位interview，基本上一字一句全office嘅人都聽得好清楚。
（全英文交談，嘗試憑記憶翻譯）
GM：「點解你想入日資公司工作？」
阿基：「我由細到大都好欣賞日本文化，讀書嗰陣已經開始睇日本漫畫，而家都有追日劇。」
GM：「咁你識唔識日文？」
阿基：「其實我準備去報。」
GM：「唔緊要，我哋公司會全額贊助大家，如果要收工去學日文ok嗎？」
阿基：「當然冇問題啦！」
GM冇開空頭支票，喺油麻地一間日語學校報咗個團體課程，每逢二、四仲會畀大家早半粒鐘收工，等我哋幾個同事可以上堂前食個快飯，不過上咗第一堂之後，阿基就開始係咁鬧。
阿基：「は唔係讀ha咩？點解有時會讀wa嘅？」
我：「第二堂咪有教囉，助詞要讀wa吖嘛！」
阿基：「助詞呀？咁佢哋設計個わ（wa）嚟做咩？本身咪有個wa音囉！其實日本人個腦係咪裝屎？啲日文亂柒咁嚟嘅？」
阿基間唔中會喺公司攤開啲筆記，但就邊學邊屌，「を究竟係讀柯定窩啫？」、「計埋片假名根本唔止五十個音，咁樣呃9人？」、「又敬語又謙讓語又丁寧體，唔好扮晒嘢啦日本人，最L變態就係你班㗎仔！痴漢電車又有，AV直頭有啲未亡人系列，喺老公張遺照前面搞嘢，又夫前，又亂倫，你同我講敬語？」
同阿基一齊返學讀日文簡直係折磨，成堂係咁屌嚟屌去，你學就學，唔學就唔學啦！其實公司對我哋真係唔差，除咗全額贊助上堂之外，GM仲會間唔中幫我哋補習，見工時問過你係咪有興趣學先至請，又唔係呃你入嚟做，又唔係拎住把槍迫你學，點解要一路讀一路侮辱人哋嘅語言呢？
阿基：「其實日本人個腦係咪裝屎㗎？啲日文亂柒咁嚟嘅？」呢句係佢嘅口頭禪，三日唔埋兩日就會講一次。
我：「又咩事咁激動呢？」
阿基：「你唔覺得日文好多餘咩？英文講please，中文講唔該，日文就要お願いします，咁多字先代表一個意思，多鳩餘！仲有呀，英文係Me，中文係我，日文又要わたし，煩唔唔煩啲呀！唉，唔讀喇，冇心機，遲啲搵個日文老師一對一咁教我。」
阿基之後真係冇去上堂，感謝主🙏🏻🙏🏻🙏🏻之前同佢一齊坐係聽唔到Miss講書，後來終於可以專心喇，我啲日文亦開始大進步。
好戲在後頭，話說一年之後，東京總公司請香港分部同事過日本交流，包住宿同機票，阿基第一個舉手搶住要去，定啲嚟啦，人人有份㗎，平時唔尊重日本文化，有免費旅行就話「返鄉下」，返咩鄉下啫？
去到東京阿基keep住認屎認屁，GM喺餐廳叫我哋嘗試自己叫侍應落單，個個都講到，係阿基講唔到，咁都算，當我order完之後，阿基對住我咁講：「吓！咁簡單㗎咋！我都識啦！返到香港再讀返日文先，應該好快勁過你。」
坦白講，最初同阿基做同事真係好谷氣，不過後來冇喇，因為上天好公平，喺呢度工作嘅第4年，GM向日本社長推薦我去東京總部工作，其實即係升職加薪，而阿基仍然喺香港分部做嘢，早兩日佢先voice msg我：「日本人真係白痴，唔怪得經濟蕭條啦！你話我知點解要分平假名同片假名？一隻字記兩個寫法，即係唔止50音啦！」
講呢件事出嚟唔係要笑阿基，而係想提醒自己唔好做阿基，唔好成日覺得自己好叻，但所有嘢都係「打嘴炮」，輕視別人，高估自己。6年前我同阿基都係由N5起步，雖然我而家啲日文都唔叻，但起碼可以喺工作上溝通到，而阿基用咗足足6年時間仲未搞掂50音，依然原地踏步，日日鬧嚟鬧去咁有意思咩？