開玩笑真係要適可而止，特別係對住同事，我公司有幾個男人不嬲都玩得好癲好過火，無可否認有時係幾搞笑，但係間唔中會過晒火位，親眼見過佢哋互相串嚟串去突然反面，之前仲特登開咗盤，輸賭邊個同事最快辭職，最初注碼係錢，搞搞下變咗喺公司樓下祼跑一個圈。
佢哋仲叫我哋成班同事做證，當時以為只係開玩笑，點知係嚟真。開始嘅時候有一個人做莊，純粹玩幾百蚊，後來其中兩個人唔知因咩事拗到面紅耳赤，然後變咗佢兩個之間side bet，講到要全裸跑一個圈先算數，其實係咪好勝心作祟呢？
因為公司有個Department好似走馬燈咁轉人，佢哋嘅輸賭範圍就係嗰一team，其中一位叫Alan嘅同事就買Olivia辭職先，另一位叫Edward嘅同事就買Taylor辭職，果然唔使好耐就有賽果，Olivia做咗兩個零月resign，換言之係Edward輸咗。
Alan：「嗱，唔好賴皮呀，唔算數正契弟，一世冇發達，買六合彩一個字都唔中，溝女戴綠帽，生袋癬，不舉。」文字已經係冇語氣，真實中係講得串好多，咁嘅形勢Edward當然唔會認衰仔求放過啦，因為Alan一定會不斷拎返出嚟串佢同恥笑。
Edward：「我而家有話賴皮咩？裸跑有咩問題呀？返上嚟再賭多round，我今次再買第二個辭職先，同一個賭注，敢唔敢受？」
Alan：「你裸跑咗先算啦！數都未找又同我賭，除衫先啦！」
當時佢兩個已經明顯有火㗎喇，成個氣氛好唔和平，有人想做和事佬，提議請食飯就算數，Alan都開始收斂，不過Edward實在係唔衰得，兩三下散手已經除咗上身，準備要解皮帶除埋條褲，有個別女同事仲嘩嘩聲，亦有人叫Edward適可宜止，不過冇人勸得聽。
再有人做和事佬：「喂，裸跑一陣畀人捉上差館呀，著返衫啦！」嗰陣Edward真係褲都除埋，淨返條孖煙囪，有人見勸唔掂就退而求其次話夠啦，最盡係咁，底褲都除埋變相性騷擾其他女同事，Alan開始鴕鳥唔出聲，我估佢知玩大咗，總之最後Edward就真係除淨孖煙囪，但著住皮鞋，就咁行出office門口，仲叫其他人睇住佢跑做證。
冇人跟住落樓，只係知道Edward返上嚟冇耐，兩個大廈保安都上埋嚟，Edward好似想將怒氣發洩喺保安身上：「咩呀？我有著底褲㗎！大把人都係著住條短褲跑步啦，你唔去捉佢哋？傻㗎！我犯咩法呀？」
保安反而冷靜過佢：「唔係話你犯法，想確定你係呢度返工啫。」
Edward又loop：「咁叻走去捉晒赤膊跑步啲人吖！」
公司有人走去話畀老細知，我入嚟做咁耐都未見過老細咁嬲，佢直情行咗去Alan同Edward嘅部門咆哮，真係咆哮咁大叫：「喂！」然後就好大聲問發生咩事，捉咗Alan同Edward嘅大佬（上司）入房照肺。
聽講老細本來係想直接炒Edward，但個大佬幫手求情，最後先唔使出動到大信封，不過大家都知道Edward喺公司同玩完冇分別，起碼一段時間唔使諗升職加薪，唉，何必呢，你話係咪攞嚟搞吖，只可以話人人條界線唔同，Edward寧願要呢個後果都唔想畀Alan串。
呢件事發生咗幾個月喇，Edward同Alan仲未friend返，但Edward個格真係好勇鬥狠，有時會串柒柒問Alan仲賭唔賭，Alan唔出聲冇理佢，收手啦，下次老細唔會再有情講，同埋再咁樣落去，佢兩個遲早會出事。