投稿讀者：Erin
我係HR，公司請人其中一個程序係做Reference Check，一般我唔會打電話去麻煩人，只會預鬆時間send Email過去candidate舊公司，咁多年以嚟真係不同種類嘅feedback都見過，有人好肯幫前僱員講好說話，千叮萬囑我哋要請；有人係完全唔覆，完全置前僱員嘅前途於不理。
幾個月前有一次Reference Check令我印象深刻，因為candidate個前上司反應好大，我只係send Email去麻煩佢填返張form，張form仲要只係剔剔剔就得，連comment都唔使佢哋寫嗰隻，不過呢位前上司竟然直接打返電話畀我。
「Cherry去你公司見工呀？佢之前辭職明明係話想休息下㗎喎。」
我：「咁你都識講之前啦，佢離咗職都差唔多兩個月，可能已經休息完呢！」
「咁Cherry擺明唔係休息啦，之前係講大話啦，佢根本想轉工，又唔同我講真話。」
我：「咁每個人都有自己離職嘅理由，何況佢加入我哋公司，係有佢自己嘅career goal，我又唔覺得佢係講大話。」
「你哋會想請一個唔老實嘅員工咩？」
我：「你所講嘅唔老實，係指佢工作上有唔老實嘅地方？定係指佢話想休息下呢個離職原因？」
「梗係離職原因啦！佢喺我哋呢度走都冇講真正原因，咁第日喺你哋度走都唔會講出真相㗎喎，可能兩三個月後又同你講想休息下跟住resign。」
我：「其實Cherry之前工作都好穩定，每份工都最少兩三年，我覺得無須要太早擔心佢下次離職嘅問題，何況要擔心都係我哋呢邊擔心啫，不如咁吖，你係咁易剔返我頭先Email過嚟張form先，因為我哋內部需要繼續process。」
「我轉頭打返畀你。」
佢嘅前上司收咗線之後唔夠5分鐘，又再一次打畀我。
「頭先我打咗畀Cherry好多次都冇聽，其實佢有冇向你透露點解要離開我哋公司？」
我：「其實candidate點解要離開，同埋真實原因點解要離開，我覺得唔係好重要，最重要係佢符合我哋公司要求，我做Reference Check都係想清楚candidate提供嘅工作證明係咪正確，例如任職年期啱唔啱？或者你會唔會剔返張form畀我哋先？因為真係等緊。」
「我都係想知Cherry點解resign唔講真實原因畀我聽啫，你哋出幾錢人工畀佢？」
我：「唔好意思呀，唔係好方便透露，因為涉及candidate私隱，呢啲已經唔係佢past experience，而係佢將來嘅package，唔方便透露。」
「你都好串喎，你叫我填form又得，我問你Cherry而家個salary又唔得。」
我：「我好有禮貌喎，絕對冇串呀先生。」
我冇諗過做Reference Check會畀candidate前上司煩咗我成個下晝，直至投稿呢一刻，即係幾個月後，我仍然冇收到Cherry前上司填返嚟嘅form，不過最後都有請Cherry，我已經同公司講咗呢個情況，可以彈性處理，據我理解，Cherry喺我哋公司都做得好開心。
記得睇過聶生你一篇文章，入面講過員工離職不外乎幾個原因，一係錢唔夠，一係冇前途，一係就做得唔開心，其他原因都只係畀大家一個落台階，我希望Cherry呢位前上司會明白呢一點，唔需要太執著，亦唔應該因為咁而阻礙一位前員工嘅發展，可能有啲公司真係收唔返Reference Check就唔請一個candidate，影響可以好大。
Cherry冇bad mouth佢嘅前僱主同埋前上司，至於佢當時真正嘅離職原因，我相信都唔使多深究，如果我上司係咁樣，真係早走早著。