食飯食唔乾淨 第日個老婆會痘皮

以下呢啲呃細路仔嘅說話,你聽過幾多個?

👉 食飯食唔乾淨,第日個老婆/老公會痘皮
👉 唔聽話會有烏鴉婆嚟搵你
👉 食多啲蔥第日大個會聰明
👉 講大話會甩大牙
👉 裝人沖涼會生眼挑針

全部我都真心相信過,不過全部都係呃人,特別係裝人沖涼會生眼挑針,雖然我冇裝過,但係年年月月睇咁多AV,咩埸面都見過晒,乜事都冇,你嚇鬼呀?

對我嚟講最大傷害反而係呢句:「食飯食唔乾淨,第日個老婆就會痘皮㗎喇,你睇下,仲有剩喎,你想唔想娶個靚老婆吖?」細路仔就梗係驚㗎啦,咪嗱嗱臨食晒佢,一粒飯都唔留囉,第日我老婆一定皮光肉滑喇啩!妖~~~點知女都冇,講經呀!

我細佬食飯就最唔乾淨嘅,次次幫佢洗碗都好煩,要抹晒佢啲飯粒同埋剩餘嘅餸,結果呢?佢咪又係爬我頭娶咗個靚老婆,所以我正式宣布,嗰啲嚇小朋友嘅說話全部都係搵笨實!

當然,後來我都明白,大人叫你食得乾淨啲,一粒飯都不留,並唔係想你娶個靚老婆,佢哋只係想洗碗嗰陣舒服啲啫,呢個良好習慣我keep到而家嘅。

呀~~~仲有一句呃小朋友嘅說話又係好常見~~~「拎啲利是出嚟吖,幫你儲起晒佢,第日用嚟讀大學。」

後補PS:細佬開咗個YouTube channel叫《細佬日本成長日記》,大家記得支持下佢,我就齋sub唔睇,費事葡萄。

error: