有一日我食完lunch，入到office部手提電話就響，係我之前偷偷請假去見工嗰間公司打嚟，個Line Manager話HR見完我覺得冇問題，不過佢自己因為較早前中招，所以一直Work from Home，希望用電話同我做Second Interview，Ok的話甚至可以confirm offer，咁梗係好啦，起碼唔使我請多一日假。
拎住電話返埋位嘅時候，明明成個Department都冇人，咁我就費事行出走廊傾啦，因為當時係1:45左右，隨時有同事食完lunch返嚟，畀人見到喺走廊傾電話好奇怪，我又唔想再落樓下，會議室亦畀幾個帶飯返工嘅同事用咗嚟開餐，橫掂冇人就喺自己個位Phone Interview囉，同事食完返嚟至少正面望到吖嘛。
人哋公司個Line Manager：「介唔介意約略介紹下你自己？因為上次1st Interview我冇join，中文都得㗎喇。」
我：「冇問題，我叫Jessica，之前喺加拿大讀書，Simon Fraser畢業，返到香港第一份工就係做XXX，咁做咗兩年想要新嘅挑戰，然後就轉咗去XXX，喺嗰度學到好多嘢呀，不過我唔係太鍾意成日返內地，始終我一個女仔，好多時冇同事一齊返，結果就嚟咗而家呢間公司。」
人哋公司個Line Manager：「因為份CV見唔到你last salary係幾多，介唔介意講下？」
我：「上次我嚟應該另外填咗張application form，不過唔緊要，我而家人工係$30,000，有雙糧，另外仲有花紅。」
人哋公司個Line Manager：「清楚，HR大約都講咗我哋公司嘅架構畀你聽啦，咁我再講多少少請呢個位係想你做啲咩……」（下刪對方講咗幾分鐘嘅內容，而我都係不斷「係，係，嗯，嗯」咁樣回應。）
就喺呢個時候，我聽到背後有聲，當時有啲驚，明明冇人行過入嚟我呢邊。
人哋公司個Line Manager：「如果4月頭返工你有冇問題？」
我：「哦，冇問題，4月頭ok呀！」幾驚都要答咗人先啦！
同一時間，我後面又有聲，今次係人講嘢，聽唔清楚講咩，因為我已經嚇親，但更驚嚇嘅係，喺我後面隔兩張枱有個人徐徐喺枱底企返起身，今次仆街喇，係我上司呀！
我當時失晒理智，可能偷食畀男朋友捉到都冇咁驚，嗱嗱臨話自己要做嘢收線，再企起身問我上司：「你喺度嘅？點解頭先見你唔到㗎？」
上司：「部主機想擺返落枱底吖嘛，咪拆晒啲電線逐條逐條拉返落去囉，順手拆埋個keyboard架，成日撞到手踭，而家啲keyboard擺上張枱啦，仲點會用個推出嚟嘅架，想拆好耐IT又話唔關佢哋事，咪自己整囉！枱底勁多塵，阿姐真係求其吸塵㗎喎！」
今次真係玩完！我竟然冇check清楚就坐喺個位同人Phone Interview，而我上司原來一直喺佢枱底整緊嘢，呢啲嘢搵人整吖嘛，做咩要捐枱底呀？我又賤格既，一早應該落樓先傾啦！
上司：「我都係聽到有人講電話先知你返咗嚟，仲諗住叫你幫手喺枱面拉條線落去畀我，不過見你傾緊就費事啦，係喎，你同邊個傾呀？要講咁多私人資料嘅？」
我唔知點解自己會咁樣答，可能係因為知道照直講Phone Interview會好尷尬，你估下我用咗個咩藉口…..
我答
.
.
.
「我join咗Speed Dating，相睇，一對一嗰啲。」
上司：「真係㗎？我都聽人講過，好似可以配對返高學歷高收入，唔怪得你要答佢咁多工作上嘅嘢啦！我仲以為呢啲相睇公司通常好求其，原來讀邊間大學、返過咩工、人工幾多、有冇雙糧花紅都要答得咁詳細。」
我真係分唔到上司係玩我、特登唔踢爆我，抑或咁都會信，佢職位雖然高，不過風格上比較粗枝大葉，可能係男人嘅關係啩，總之我分唔清佢係咪放我一馬，因為上司仲好認真繼續追問。
上司：「Jessica其實你唔使相睇吖，仲咁後生，不過我哋公司啲男同事又真係個個結晒婚，你多啲同朋友出去就識到男仔㗎喇，呀，係喎，而家冇晚市，酒吧又唔開，係爭啲。」
跟住開始有同事返嚟，呢個話題亦隨之結束，我作完個藉口都覺得自己好癲，如果佢咁都信就仲癲，但你問我有冇後悔答「相睇」呢？我都會話冇後悔，因為當時實在太尷尬，若然上司唔踢爆係想大家好落台，咁目的總算達到咗。
唔後悔話自己「相睇」仲因為嗰份工最後冇請我，Phone Interview之後一路冇回音，想我4月頭返工應該一早打嚟，辭職都要一個月通知㗎嘛，而家都差唔多4月中啦！所以嗰次如果照直講係見工，最後又轉唔成，我真係唔知點做落去。