階級觀念嚇親人 散水餅有高低之分

好多人都話離職買散水餅好多餘,隨時仲會畀人嫌三嫌四,但最近公司有個好乞人憎嘅Middle Level辭職,佢請食散水餅嘅行為真係令人極度反感,唔係有餅食都唔鍾意,而係呢位中層職員太過份,結果連茶水阿姐都唔肯食,怕背脊骨落。

嗰日佢last day,買咗啲西餅擺喺pantry,有個女同事就隨手拎件嚟食啦,點知食到一半畀條友走埋嚟話:「喂,你做咩食呢款呀?我留畀陳生何生佢哋㗎,呢盒個包裝特別唔同,得8件,你見唔到分別㗎咩?貴好多㗎!你食其他嗰幾盒吖嘛!」

氣氛尷尬到暈,個女同事已經食到一半,你係咪想佢嘔返出嚟吖,係咪要咁講嘢呀?做人識唔識大體呀?個女同事剩返半嚿都冇再食落去,仲同嗰位中層講:「賠返畀你囉!」Feel到女同事已經有少少嬲。

Middle Level:「唉,算啦!不過我計晒數另外買咗8件貴嘅畀陳生何生佢哋班高層㗎!而家少咗件真係麻煩,唔緊要啦!大家隨便去pantry拎西餅食,記得呀,黑色盒嗰盒唔好食,你哋食其他嗰幾盒啦!唔好攞錯呀!」

好在我當時忙緊一直唔得閒,你請散水餅都要有階級觀念,大家聽到當然唔舒服啦,不如拎返走冇咁眼冤,好小家呀!

呢條Middle Level仲煞有介事咁行入pantry同茶水阿姐講:「隨便食吖,不過黑色呢盒係貴嘢,我留畀班高層㗎,可唔可以幫手睇住?叫其他人食白色呢幾盒啦!」

茶水阿姐堅呀,當時pantry裡面另一個同事聽到佢咁樣回答:「我大把嘢做得鬼閒幫你睇住啲西餅咩?邊啲貴嘢要畀邊啲人,你自己拎入房啦,一陣其他同事食咗你又呱呱嘈,我唔負責㗎!」

Middle Level:「我都想呀,何生佢哋開緊會吖嘛,我又要去人事部搞埋啲手續,阿姐你都食啦,預埋你㗎喇,記得唔好食黑色嗰盒就得喇。」

茶水阿姐:「大把嘢做唔得閒食。」跟住就行開咗。

其實呢位Middle Level過往已經好有階級觀念㗎喇,例如對住普通同事招呼都唔打,對住高層就烚熟狗頭,不過估唔到佢last day派散水餅都可以咁乞人憎啫!

喝住食咗半嚿散水餅嗰位女同事單嘢太唔大體,各同事已經好快喺WhatsApp group討論,大家仲話唔會食(有個別同事因為唔知發生咩事所以食咗,但係都唔超過5件),所以除咗派畀高層嗰一盒之外,其餘嘅散水餅完全冇人掂,條Middle Level離開公司之前仲夠膽死補多句:「各位,pantry有好多西餅呀!而家入面嗰啲全部都食得㗎喇!」

全部人低頭繼續工作冇理佢。

最搞鬼係第二朝返嚟,老細見到pantry有西餅冇人食,但係又唔擺入雪櫃,然後就對住茶水阿姐講:「嘩!仲有咁多冇人食嘅,會唔會壞㗎?」

當時我都在場,聽到茶水阿姐好簡單覆咗一句:「冇人吼!個個都唔想食。」

點估到老細嗰句仲精警:「咁睇嚟佢人緣都幾差喎,派餅都冇人食。」

係呀!說出重點,雖然老細未必意識到嗰條Middle Level玩階級觀念,散水餅都分貴同埋平兩種檔次,不過佢應該清楚了解到條友嘅人緣好差,最後茶水阿姐真係丟晒落垃圾筒,你唔尊重人先,咁都唔好怪人哋唔領你情。

error: