幾年前公司獲得LinkedIn邀請，去咗佢哋香港嘅office參觀同埋上一個course，老細上到去即刻嘩嘩聲，首先有個Area係畀員工坐喺小梳化度打機，又有個迷你雪櫃，飲品齊全，任攞唔嬲，做做下嘢可以走過嚟放鬆簡直係一流。
咁都未算，佢哋個會議室前面仲有一張桌球枱，由於會議室係落地玻璃，我哋一路上course，一路睇住LinkedIn兩位員工喺出面篤波，chill到呢！當時老細已經細細聲同我講：「嚟緊反正要搬office，大好多，我哋都買張桌球枱返去先。」
老細真係言出必行，桌球枱連裝備全部買晒去新office，PlayStation又有，仲要買晒FIFA、NBA、OVERCOOKED! 等等嘅game，兩張單人座位梳化，加兩個軟綿綿坐得落成個人嘅大Cushion，佢真係抄到十足十LinkedIn一樣。
咁都未算，老細仲斥資買咗個Smeg雪櫃，其實喺我眼中呢，Smeg係型，但實用性真係一般，Anyway，呢個雪櫃買咗二萬幾蚊，入面再擺晒Red Bull、綠茶、可樂、果汁任飲，作為員工嘅我都開心既，人人都希望office又靚又有好配套㗎啦！
初時大家玩得好開心㗎，有啲友仔仲特登唔出去食飯，就咁買個飯盒返嚟嗱嗱聲食完然後一齊篤波，office嘅氣氛都好熱鬧，但係久而久之就開始失控，先由個雪櫃講起，有人每日將啲Red Bull綠茶可樂搬返屋企……
坦白講，擺得喺度任你飲，公司都唔係小家，好多同事放工都會拎走支果汁邊行邊飲，不過有個別同事就拎埋環保袋返嚟成打成打咁帶走，每日都要清晒雪櫃所有飲品先安樂，仲要畀老細見到呢下慘吖嘛，員工福利同攞走自己嘆甚至派街坊係兩回事喎！
有次老細叫個同事幫佢準備份文件，等咗大半日都唔見，行出嚟諗住追下啦，點知見到嗰位同事唔喺位，原來去咗打機，其實自從有部PlayStation之後，呢個同事每日有3分2時間都離開自己個位去咗打機，真係打到日月無光，我見老細個樣都好無奈。
桌球枱又係出事，某次有客上嚟我哋公司同營業部開會，我都喺房，開開下會聽到出面好大聲：「Wow！」
客：「好開心喎你啲同事，真係好正呀有得篤波。」
話口未完，出面又有人大聲爆粗：「DLLM識唔識篤波㗎你！」
營業部個阿頭面都黑晒，即刻衝咗出去叫班同事細聲啲，因為有客喺度開緊會。
差啲唔記得講，其實老細仲買咗張按摩椅，諗住畀班同事做到攰嘅時候鬆一鬆唞下，不過有一日某同事可能按得太舒服，按到瞓著咗，都未算，仲要有勁大嘅鼻鼾，有人已經行埋去拍醒佢，但呢位同事醒完又再瞓過，繼續扯鼻鼾。
老細喺房聽唔到，可惜佢個partner上嚟公司嘅時候睇到又聽到，當時已經見到partner黑晒面，跟住大家就叫嗰位同事唔好再瞓，不過太遲喇，掛住打機同篤波唔做嘢，老細較早前已經有少少微言，加埋佢partner入房投訴，我哋都意識到實出事。
最後點？同事冇嘢，但係啲玩樂設施冇晒囉！收晒啲桌球，收埋部PlayStation，雪櫃嘅飲品供應量少咗好多，搞到其他守規矩嘅人無法享受。
之前全日去咗打機嗰位同事仲要話：「妖！老細勁小家，唔畀人玩就唔好買返部機返嚟啦！」
小家？或者係啦！其實我個人認為好多嘢都係雙向，當初買咁多玩樂設施返嚟都係想大家可以放鬆，雖然我自己唔篤波，但係都覺得Office好似天堂，有時同啲朋友講佢哋都會羨慕，可惜部份嘅人濫用，而家一切打回原形，唉！