版主可以考慮唔刊出我呢篇投稿，又或者唔喺母親節正日出，因為呢一日應該鋪天蓋地出現Happy Mother’s day啲post同埋廣告，突然走去話有個人唔鍾意母親節，相信都幾煞風景，但我真係想講，呢個世界的確有人唔鍾意母親節。
7年前我同老婆本身冇打算咁快結婚，不過因為佢阿哥奉子成婚，阿嫂搬埋去佢屋企住，外母就強迫我老婆瞓客廳張梳化，讓間房出嚟畀阿哥阿嫂做BB房。我老婆唔高，但嗰張梳化更短，佢每晚就好似隻蝦米咁屈喺梳化瞓，連腳都伸唔直。
當年我老婆份糧得$16,500，但係每個月被硬性規定畀1萬蚊家用，仲要負責屋企水電煤，佢阿哥就算未結婚之前都已經冇畀家用，真係1蚊都唔使畀，點解？外母話阿哥搵錢辛苦，同埋男人要多個錢傍身喎！講到尾就係重男輕女，唔通我老婆搵錢唔辛苦咩？我老婆唔需要儲多個錢傍身咩？
超過一半人工畀屋企再負責所有雜費，唔止要瞓梳化，基本上連私人空間都冇，最後我提出不如一齊生活啦，所以我同老婆就喺7年前結咗婚。
結婚過程都唔順利㗎，外母要28萬禮金，或者呢個價錢對某啲人嚟講好濕碎，不過對於我嚟講係好重嘅負擔，結婚本身要使一大筆，兩個人又要搵地方住，最終老婆發晒脾氣同外母嘈先至減到18萬，我哋要同銀行申請貸款，哈，真係唔識講。
搬走咗再自組小天地以為有好日子過？我最初都以為係，後來老婆個阿哥話要買私樓，外母要我老婆夾錢幫忙，留意返，唔係借錢幫忙，係夾錢幫忙，請問係咩邏輯？因為你重男輕女，所以做女嘅就要犧牲，去成全你個仔買樓？我老婆犧牲咗好多年喇喎，仲未夠呀？而家有自己家庭，仲要將血汗錢拱手相讓畀阿哥買樓？
唔記得講，我同老婆結婚當晚，外母係全程黑面，主家席有我屋企人同埋親戚，佢哋都看在眼裡，連我舅父都話：「你外母好似唔多鍾意你咁既。」其實外母係一直嬲緊禮金要由28萬減到18萬，嬲我冇用，嬲個女係蝕本貨。
老婆同我講過一段細個嘅經歷，喺小朋友嘅時候，外父外母曾經帶佢同埋阿哥去酒店食自助餐，仲誤會咗唔知年齡細過幾多歲就可以免費入場，點知去到先發現的確有呢個優惠，不過只可以有一個小朋友免費，外母同埋職員拗咗好耐，其實解決方法好簡單，一個免費，一個俾返小童嘅價錢就得，而結果係……阿哥入去食，阿妹（即係我老婆）要喺出面等佢哋食完。
老婆話到而家仲記得食自助餐嗰度嘅門口有幾張櫈，佢真係一個細路女戇居居坐喺嗰度，因為有餐廳職員知道乜嘢事，仲私人拎咗入面buffet嘅麵包請佢食。
由於當時太細個，老婆話記憶都有少少模糊，但係好記得職員畀麵包佢個畫面，嗰陣唔識嬲，大個咗諗返先至最嬲。
早幾年佢阿哥真係買樓，唔知係咪我老婆唔肯畀錢，佢阿哥走去問人借，又問親戚借，但全部冇還，而家啲親戚反晒面，佢阿哥同阿嫂買樓後又唔理外母，所以外母後來打畀我老婆話覺得個女最孝順，我都分唔清係想我老婆幫手還錢畀親戚，還是到而家先至覺悟。
我老婆冇幫佢阿哥還債，企得好硬，外母講乜都冇用，總之每個月只會畀返固定嘅家用，唔會少，亦唔會多，阿哥喺出面點點點唔關佢事，唔想知亦唔會理。
最諷刺係我老婆做Marketing，每年嘅呢一段時間都忙住要搞母親節宣傳，無奈地要面對鋪天蓋地嘅廣告，佢直言有種反胃嘅感覺，電視、雜誌、商場、Facebook，清一色係宣揚母愛點樣偉大，母親節要買咩禮物，母親節要食乜嘢，老婆話有時會頂唔住呢種感覺，記得佢曾經講過一句：「唔係每個人都有媽媽，亦唔係每個媽媽都錫自己，有啲人見到呢堆母親節廣告可能會好唔開心，適可宜止咪得囉！」
其實我阿媽呢邊都大約知道老婆以前嘅事，所以呢幾年都會盡力畀返啲家庭溫暖我老婆，好感恩佢哋婆媳相處真係好融洽。
我老婆而家都做咗媽媽，我哋有個女，外母可能想修補關係，呢兩年經常自告奮勇話要幫我哋湊女，但我老婆好決絕唔容許呢件事發生，先唔理外母出發點係乜嘢，總之自己以前細個受過嘅苦，唔希望我哋個女歷史重演經歷一次，所以幾辛苦都堅持自己湊自己教。
就算我老婆而家做咗媽咪，佢都唔鍾意慶祝母親節，但係好過拍拖嗰陣時喇，以前我哋對呢個節日仲避忌，可能係因為我阿媽好錫佢，我哋屋企人好希望可以畀到佢一個家嘅感覺，所以呢幾年老婆都好樂意喺母親節同奶奶食飯，我哋會喺屋企煮，簡簡單單，好似家常便飯一樣。
唔知道將來老婆對母親節嘅感覺會唔會改觀，我只係想佢內心唔好記恨，因為嬲一個人其實都係辛苦自己，期待將來我哋個女大個咗，同佢講一聲「母親節快樂」嘅時候，我老婆會欣然地接受。
「幸運的人一生都被童年治癒，不幸的人一生都在治癒童年。」希望我，我屋企人，仲有我哋個女，可以幫老婆治癒佢嘅童年。