有時對住啲Department Head真係會無語，公司有個女人話佢部門要請人，咁咪出招聘廣告囉，學歷經驗樣樣跟住要求，搵到個條件好好，談吐舉止又得體嘅，諗住嗱嗱聲畀佢見完出offer啦，點知又ban返轉頭，你ban唔緊要呀，個理由可唔可以正常啲呀？
我：「Lawrence係咁多個求職者裡面最好㗎喎，今日有一個全程鬧舊公司，仲愈講愈激動爆晒粗，另一個就問可唔可以Home Office直至年底先返工，其他嗰啲CV又唔合你心意，點解唔畀個機會Lawrence呀？佢各方面都好好，連expected salary都喺個range入面。」
估都估唔到呢個Department Head會咁樣答我：「Lawrence工作方面係好，但我冇留意佢係1987年。」
我：「1987年有咩問題？你嫌佢老定後生？」
「因為佢同我相差7年，呢啲一定係賤男！」
我：「即係全部1987年出世嘅男人都係賤男？」
「唔係1987年出世就係賤男，而係我之前兩個男朋友都大我7年，兩個都係賤男，原來我唔可以同大我7年或者細我7年嘅人共處。」
乜L嘢呀？你究竟講緊乜L嘢呀？
聽返呢位現年42歲嘅部門女主管講，佢上兩任男友都大佢7年，兩個都係因為偷食而導致分手。
「其實發現第一個偷食嘅時候，已經有師父幫我睇過，仲話我唔可以同大7年或者細7年嘅男人一齊，因為呢啲人會不斷傷害我，最初唔信㗎，點知下一個又係咁，好似倒模一樣。」
我：「咁……即係Lawrence請定唔請？你覺得佢點先？」
「Lawrence係唔錯，不過佢講嘢好圓滑，似足我之前嗰兩個男朋友，開頭梗係好㗎，耐咗就會見到啲衰嘢。」
我唔想知呀！都唔係問緊你感情嘢，淨係答我Lawrence條件上適唔適合請返嚟做員工咪得囉！有心事你一係搵白姐姐，一係打上去電台啦好冇呀？
我：「咁得啦，我再睇下有咩CV，今次見完畀你過目先。」
「記得喎，我係1980年2月2號生日，細我7年半都唔好喎！」
我：「OkOk，咁我返出去先。」幫你慶祝埋生日好唔好？
「之前個男朋友真係賤到冇人有，條友玩交友App，仲要擺我同佢張合照出嚟，然後blur咗我個樣，好衰唔衰我個friend有玩嗰個App，又見過佢，咁咪即刻cap圖send畀我睇囉，問佢仲要死口唔認，話唔知邊個咁大整蠱偷佢張相喎！痴線！當自己係明星呀？偷你張相做咩呀？後來問問下先知佢原來仲有SP，我唔得呀，即刻分手囉……」
臨尾佢捉住我分享兩個前男友出軌嘅事，好在咁啱有人敲門入房搵佢，否則應該要聽足成個鐘。大姐呀！你個部門請一個位啫，但其他Department仲有position等我請㗎，個個好似你咁，求職者fit晒要求，但原來細你7年或者大你7年就唔請得，我搵人嘅時候咪好多限制？你加重緊我嘅工作量呀！
聽過有啲公司請人要夾八字，要夾生肖，真心覺得好無稽，站在求職者嘅立場，人哋讀咁多書，累積咁多經驗，最後竟然因為你一個咁奇怪嘅理由而選擇唔聘請，難聽啲講真係死都唔眼閉，請人啫，唔係搵老公喎，正常啲睇能力得唔得？