旺角 台灣菜 阿木台灣麵
今日中午同老婆落旺角影相，半個鐘多啲啲已經影咗超過六百張相，見有啲肚餓，於是行去「阿木台灣麵」開餐。「阿木」係某些群組好出名，排隊排到人山人海就好多人都知…… 好彩最近開咗新店，影相地方又近新店，於是同老婆拖手仔行過去。行咗五分鐘，到新店門口，已經有成十人排隊等緊。老婆攞咗飛，要等二十幾個號碼…… 等咗半個鐘左右有位。排隊期間已經揀咗想食乜，交咗order紙，好快有得食。
(左) 紅燒牛肉麵 $65 ／ (右) 蕃茄牛肉麵 $65
台灣嘅牛肉麵，湯，係靈魂。阿木做得好對辦，兩碗麵嘅湯都好味道。紅燒個湯好地道，蕃茄湯個蕃茄味都好濃好夠味。麵條夠彈牙，大量葱花同配菜之餘，令我好欣賞嘅，係碗麵有四塊牛肉。呢四塊牛肉，件件有一塊「白豬仔」餐肉大小，足足1cm厚…… 大佬，去「大乜鑊」「大個砵」食鐵板牛扒都無佢咁大份，但價錢比佢貴…… 呢樣真係無得頂。不過，牛肉如果質素高小小會好啲，因為有筋，但以呢碗麵價錢份量同質素，係香港係頭三位。
「家傳鹽酥肉」
唔算好特別。肉嘅部位應該係豬頸肉，好彈牙，炸得剛好，唔錯。
「花生麵筋」
10蚊雞，細細兜，應該普普通通無乜特別啦…… 咁你就錯哪。麵筋夠入味，花生入味夠淋，兩樣加埋一齊好合拍。而麵筋係食得出用心做，比起好多香港上海鋪嘅『四喜烤麩』高。我估非店家出產，因為門口有得一樽樽賣。我走果陣買咗兩樽。
「芝士肉鬆蛋餅」
呢樣又係好啱我心水。肉鬆係脆身果種，所以有咬口之餘，同芝士嘅半溶、蛋嘅軟熟以及醬汁互相配合，令味道上一個層次。
「黑糖珍珠奶茶」
呢樣好一般，正價唔會叫……
評分
環境：3/5 （座位差不多膊頭貼膊頭，香港特色……）
食物：3.75/5 （好啱我口味，只係每次要等半個鐘會令我怕怕……）
總結
地方好珍貴，每次出餐都要經過我膊頭……對食客、餐廳、員工有一定風險…… 不過我唔介意你淋落我身，只要比張VIP卡我，每次嚟，只要等十分鐘就可以坐低，我願意搏一搏……
阿木台灣麵 Mu Taiwan Noodles
旺角豉油街100號地下
G/F, 100 Soy Street, Mong Kok
*只收現金
圖文：呀七
版權所有，不得轉載
仲想睇下有咩好嘢食推介，就睇下👉呢到👈啦～