[打卡好去處] [尖沙咀 Cafe] [台灣菜] [Fusion] [花香] [K11 Art Mall]
想搵間可以打卡又就腳嘅Cafe, 呢間係尖沙咀K11 Art Mall嘅「花香」Floom Floom 係一個唔錯嘅選擇！經常路過K11 Art Mall都會俾呢間係電梯傍散發住粉紅色霓虹光嘅餐廳吸引，終於決定同朋友試一試、打一打卡！放眼望過去水泥牆身配上粉色花花，呢個咁IGable嘅裝修，一直都以為係食西餐嘅地方，雖然我都唔錯晒，但點會估到原來係主打台灣味道嘅Fusion Cafe!
一坐底見到咁靚嘅餐具仲配上印有餐廳logo嘅餐碟，望多幾眼仲發現張枱係白雲形狀，呢d小細節都係有設計過，的確有心思。不過要注意餐碟個底比較平滑，好容易轉嚟轉去，見佢係咁轉，我就放咗張紙巾係碟底就冇再轉喇～
無論一間餐廳裝修幾靚都好，擺盤幾值得打卡都好，講到尾食物質素先係最重要，唔好食嘅話幾靚都係假～
首先講吓主食先，睇menu俾圖片吸引咗，揀咗成個富士山咁嘅骨膠滿滿熔岩飯同埋招牌菜花香特色月見卡邦尼意粉。見到「骨膠」呢兩隻字，女士們都已經雙眼發光，有得食住養生何樂而不為。加上咁可愛嘅山形擺盤，一定要試！
醬汁味道接近台式肉燥，調味偏鹹最好就配多兩啖飯。開頭食咗幾啖唔覺有咩「骨膠」，但食到一半就會發覺嘴唇會有漿漿地嘅感覺，就好似岩岩飲完花膠湯咁。而醬汁入面配有桃膠，桃膠帶有少少煙韌嘅口感，相當特別。
一上枱就引到我同朋友「哇」一聲嘅就係呢碟花香特色月見卡邦尼意粉，原因係份量比想像中多，大大碟放到滿嘅意粉，再加上鮮豔悅目嘅配菜，同平日食開見開嘅卡邦尼意粉真係差天共地。
呢個意粉係我今餐最鍾意嘅一道菜，芝士味夠濃而意粉亦煮到軟硬適中，配上平日食卡邦尼唔會見到嘅蝦肉，我下次嚟「花香」都會再叫呢個卡邦尼意粉。
朋友係一個台式蛋餅迷，難得可以share食，所以就叫咗兩份蛋餅，一鹹一甜嚟試下。兩份蛋餅味道上都冇乜驚喜，雖然價錢係偏貴，但勝在造型搭救，都叫做可以接受。而相比起鹹味嘅「蛋蛋拉絲蛋餅」，我會較推薦甜味嘅「紫薯蛋餅配牛奶麻糬」，因為呢個配搭係其他餐廳比較少見，當中嘅紫薯蓉都十分濃郁，鍾意紫薯嘅朋友就啱晒喇。
去到飲品環節，一貫餐廳嘅打卡風格，造型當然唔會令人失望。唯一可惜嘅就係「髒髒朱古力」一飲落去就即刻有種似曾相識嘅感覺，同屋形朱古力奶嘅味道有九成相似，絕對唔難飲嘅，外型都夠晒「髒髒」，但一路飲就會一直覺得自己飲緊屋形朱奶嘅感覺真係有d唔抵玩。
可能係因為試完「髒髒朱古力」就對飲品嘅期望調低咗，無期待就無失望嘅心態下，呢杯「水泥咖啡」又唔錯喎，以為佢淨係得個樣，成杯都黑白灰，看唔到任何啡顏色，但入口係好香滑嘅牛奶咖啡，絕對有驚喜。
髒髒系列嘅另一款式「髒髒抹茶」，飲品嘅抹茶味適中不過不失，反而杯上嘅抹茶味嘅雪糕就非常夠茶味。比「髒髒抹茶」更吸睛嘅就係掛住係杯邊嘅貓貓攪拌棒，真係想即刻買枝返屋企呀。
如果想試下呢間「花香」Floom Floom就最好提前一個星期訂位，唔想食白果就要注意喇～
花香 Floom Floom
尖沙咀K11購物藝術館B2樓201號舖 (近西鐵尖東站／尖沙咀站 N2出口)
Shop B201, B2/F, K11 Art Mall, Tsim Sha Tsui
電話： 55006239
星期一至日 12:00-22:00
圖文：Shelly
版權所有，不得轉載
仲想睇下有咩好嘢食推介，就睇下👉呢到👈啦～