雖然好似有份畀人鬧，不過我都覺得好開心同埋興奮……事緣有個同事Stanley一向同老闆娘唔啱，起因係老闆娘作風太過一言堂，講任何嘢出嚟唔係想問意見，而係要你執行同附和，而且會突然跳掣，用一啲好侮辱性嘅說話鬧人。
記得有次，老闆娘開會嗰陣提出一個極離地嘅方案，就係要我哋搵50個KOL免費宣傳，佢話互惠互利，最多送啲產品畀人，總之就唔會直接畀錢作為酬勞，我哋班細嘅一向冇資格出聲，有幾個senior就例牌話方案可行，唯獨是Stanley唱反調。
Stanley：「咁樣搞到公司好cheap喎，傳咗出去都唔好啦，呢啲做法好容易有公關災難，隨時畀啲KOL cap埋圖出去……」
都未講完，老闆娘已經著火：「你唔試下點知呀？唔係個個都好似你咁，淨係識睇錢嘅！所以話貧窮限制想像真係冇錯！」
Stanley：「咁做嘢唔睇錢睇咩呢？」
老闆娘：「你問咗先啦，成日就想做最舒服嘅嘢，餵埋你食好唔好？如果我好似你咁諗就唔會有自己公司，一世學你咁打工啦！」
Stanley：「唔使咁講嘢嘅，你搵50個KOL都要叫agency幫手啦，KOL你唔畀錢，咁agency嘅budget呢？」
老闆娘：「我咪講咗送product囉！啲agency都可以收product㗎，佢哋鍾意自己拎晒嚟用唔畀KOL都得，你畀個offer佢哋，等啲agency自己安排啦！」
Stanley：「如果個個客都係咁，啲agency出糧出product呀？找卡數同銀行講用product代錢呀？供樓又用product代錢呀？」
老闆娘：「你諗嘢狹窄啫，點知人哋唔得呀？咁叻你就唔使幫我打工啦，你做咗我個位啦！」
以上只係其中一次爭執事件，Stanley同老闆娘嘅衝突多不勝數，問心嗰句，通常都係老闆娘提出白痴同埋無理要求嗰陣，Stanley先至會同佢嘈，一般情況之下，Stanley係會當老闆娘透明。
咁點解老闆娘唔炒Q咗Stanley呢？因為Stanley真係做到嘢囉，不過老闆娘應該都想炒嘅，只係一直搵唔到replacement啫！
由於老闆娘永遠覺得自己係宇宙最強，完全冇諗過Stanley上個月竟然主動辭職，老實講我雖然諗過有呢一日，但好似比預期中早咗，因為Stanley曾經講過想做夠2年先走，唔想張CV咁肉酸。
老闆娘向同事吩咐過，Stanley離職之後第二日就踢佢出公司個WhatsApp group，話驚佢會偷公司啲資料同策略喎……笑死，唔通偷你嗰條送product代酬金嘅橋咩，講出嚟都喺呢行整臭自己個朵啦！
點估到Stanley喺last day當晚先下手為強，自行quit group，quit之前仲打咗以下一段說話：
「可以離開呢間公司真係開心，跟住個自大又無腦嘅老闆，我發覺呢一年IQ都低咗，仲有呢度成班垃圾高層，我知你哋睇到，繼續做應聲蟲瀨鞋底啦，你哋真係好似太監侍候娘娘咁呀！唔使再見到你哋班廢人心情特別靚，等睇你哋公司出事，係咁先！」
Stanley哥，乜咁激呀？因為佢喺大group講，收到msg嘅一刻都會覺得自己有份被鬧，始終面對老闆娘嘅霸道，我平時係選擇唔出聲，但諗真啲Stanley應該想喺大group一棍打成班高層同埋老闆娘啫，唔係針對我呢啲初級小職員，所以睇到佢嘅msg嗰陣係有少少興奮。
有個高層率先發難，喺大group回msg問：「你講咩呀？」跟住老闆娘仲好笑，竟然回覆「😡」emoji，呢個時候Stanley一嘢quit group，Hit & Run冇仇報。
個大group靜咗約莫30分鐘冇人講嘢，我哋班同事嘅私人細group就梗係議論紛紛啦！估計老闆娘同班高層喺呢半個鐘內嘗試過打畀Stanley但搵唔到人，因為老闆娘靜完一輪之後喺個group講：「你哋同我刮佢出嚟！邊個有Stanley其他電話號碼？」
好多人都回覆：「冇」
講真，有都唔畀你啦，更何況我哋班細嘅都係得Stanley嗰個手提電話，你搵人應該call HR摷返當年張入職form啦，不過Stanley夠膽喺個group咁樣鬧爆老闆娘同班高層，照計唔會畀你搵到㗎喇！
同事後來討論返呢件事，有人覺得Stanley唔夠成熟，既然都離職點解唔好嚟好去，亦有人擔心Stanley之後搵工如果要reference check可能會好麻煩，但我認識嘅Stanley喺工作上算好有部署，相信佢係衡量過唔會影響到自己先咁做，我食花生係睇得爽嘅，希望佢真係有晒後著，新工作發展順順利利啦！（完）
唔止喺擂台先會見到高手過招，其實喺職場上都有唔少㗎！
員工告小額錢債 老闆小學雞手法報復
https://hkofficedaily.com/?p=12110
轉工大報復 向舊上司宣戰
https://hkofficedaily.com/?p=13454