上個月畀老細炒咗，佢直接話我人工太貴，又話上年公司條數好差，呢個年度要cut budget，其實佢一開頭係問我可唔可以減人工先嘅，不過一嚟就話要減$8,000，梗係睬你都傻啦，再搵工係難，但我過唔到自己心理關口囉！
公司炒我有賠一個月人工，仲要簽返張同意書之類嘅物體，咁就梗係收咗先算，簽咗先算，走咗先算啦，點知過咗3個星期都唔夠，老細就叫HR打畀我：「Joey，你搵到工未呀？會唔會考慮返嚟公司做？」
咁我真係未搵到工，正確嚟講應該係未開始搵工，始終人有惰性，加上一quit就即刻買機票去咗大阪，啱啱旅行完返嚟咋，都未回魂，仲喺屋企hea緊。
我：「其實我未開始搵工。」
HR：「咁就啱喇，老細叫我問你要唔要返嚟做，橫掂你都未有工，返嚟啦！」
我：「但係點解炒咗我又再請返呢？」
HR：「唔怕老實講，你走咗之後幾日已經搵到個新人㗎喇，但係返咗一日工就走咗，然後我哋又搵咗個replacement，呢個冇走，但係做唔掂啲嘢，佢啲情緒管理又有問題，anyway，老細又考慮請多個當assistant，不過計計下又覺得唔啱數，請兩個人嘅支出仲多過之前用你一個，所以咪叫我問下你返唔返嚟做囉！」
我：「聽到我好亂，但係老細當時叫我減$8,000人工喎，佢係咪想我減薪返嚟先？如果係，我就唔考慮喇！」
HR：「唔使減薪，出返原本人工，所有嘢都照舊，不過老細有一個條件……」
我：「吞吞吐吐咁嘅，咩條件？」
HR：「你走嗰陣時呢，公司咪賠咗一個月人工畀你嘅，老細想你退返畀我哋。」
我：「吓，咁搞笑，嗰陣時簽晒嘢㗎喎！」
HR：「我都知，嗱，講明先，呢個唔係我主意，係老細叫我同你講，佢話既然請返你，你又走咗唔夠一個月，咁公司呢個年度又冇budget，所以……我轉達㗎啫！」
咁我都知道唔關HR事，亦相信佢都有同老細表達咗呢種做法係有違勞工法例，因為我印象中呢位HR同事係幾盡責，反而老細份人就完全唔跟規例，諗到咩就做咩，完全亂咁嚟！
我：「要諗諗先，我咁睇，佢突然話炒我，賠一個月人工好正常……」
HR：「啱！就算調返轉係你要辭職，即走，一樣要賠一個月人工畀公司，同埋冇得話想返嚟就返嚟，然後問公司拎返賠咗出嚟嘅錢。」
我：「係，但我更想表達嘅係，佢炒咗我，而家前後3個星期，就算我答應，搞搞下都一個月喇，如果我畀返代通知金公司，咁咪即係變相出少一個月糧囉，呢啲係咪叫停薪留職？咁公司第日如果唔掂，鍾意就叫你呢個月唔好返，然後隔一個月又叫你返，點掂呀？好似做緊contract同part-time咁喎！」
HR話佢完全理解，同時再強調只係轉達老細嘅訊息，仲話如果勸唔掂我返嚟，老細呢幾日會親自打畀我傾……
我而家個心十五十六，猶豫係因為仲未開始搵工，亦唔知道搵唔搵到工，如果我堅持唔畀返嚿錢公司，咁我就要出去搏一搏。
講規矩講勞工法例，道理一定喺我呢邊，所以我都膽粗粗問過如果唔退還筆錢，係咪一定冇得返去做，HR答我係，仲話老細好堅持要我退返錢先至會再請。真心想請教下大家意見，喺咁嘅情況之下，我應唔應該食回頭草？（完）
回頭草大本營：「有同事返嚟做3次，又走咗4次」
https://hkofficedaily.com/?p=20952
上司轉工撬走同事半年後自己食回頭草
https://hkofficedaily.com/?p=19116