早幾日清理舊hard disk先搵返一堆做體記時嘅舊相，當中有呢一張，攝於2014年8月1日。
Kobe Bryant嘅比賽睇過好多，關於佢嘅故事亦都聽過好多，最深刻係有個美國隊訓練員憶述，自己被邀請去拉斯維加斯，協助美國隊進行集訓，有次凌晨4:15收到電話，原來係Kobe問可唔可以幫手做一啲健身training，佢話冇問題之後就換衫去訓練場，當時未到凌晨5點，Kobe已經成頭大汗好似游完水咁。
跟住佢兩個做咗一個鐘頭零十五分鐘嘅健身訓練，再入去gym room做多45分鐘嘅重力練習，然後訓練員就返酒店瞓覺，臨走見到Kobe自己射籃。
第二朝呢位訓練員又要11點到球場準備工作，當時佢見到Kobe射籃，所以走埋去問對方今朝練到幾多點？Kobe多謝完佢幫忙之後，就話自己一直冇離開過訓練場，仲講咗一句：「我想射夠800球先停，而家差唔多喇。」
Kobe Bryant係一個出咗名好勤力嘅人，佢嘅真人真事其實好鼓勵到我，特別係當初轉行做headhunt，知道自己完全冇天份，開唔到單，好想放棄嘅時候，我成日都會叫自己再勤力啲！再試下先！有時勤力都唔一定搵到食，所以唔勤力就好大鑊㗎喇！
人生無常，活在當下。