女友阿爸的大陸料理(2)─情侶座

早兩日咪話有個男會員要上女朋友屋企食飯既,最後佢都上咗,嗰餐仲要係打邊爐,加隻走地雞,佢女朋友好貼心㗎喇,買定魚皮餃同埋啲丸類,叫個男仔淨係食佢買嘅嘢。

「咁你知啦,邊爐一開始要等佢滾㗎嘛,等嘅期間得走地雞可以食,佢屋企人又係咁叫我食嘢。」

我:「結果要食大陸拎落嚟嘅走地雞?」

「好在我坐角落頭,喺度爬空碗。」

我:「咩叫爬空碗?」

「即係拎起個碗扮食嘢,呢餐仲要係邊爐,冇飯,個碗真係空㗎!」

我:「行為藝術嚟喎,咁都過到骨?」

「因為佢家姐有個BB女好得意,當時大家焦點都係同BB女玩,勉強過到骨。」

我:「總算無驚無險。」

「都唔係呀,呢餐仲有好多邊爐配料,有啲生豬肉,生雞肉,我有打探過伯母,佢又好精,係咁支吾以對。」

我:「唔答你?」

「係喎,我已經問:伯母,啲豬肉好新鮮喎,係咪頭先落街市買?伯母淨係笑,然後又唔講邊度買,淨係話新鮮呀新鮮呀,成件事好鬼。」

我:「但係你同得人哋個女拍拖,以後有排你食喎!」

「其實我女朋友同佢啲阿哥家姐好正常㗎,一路食飯,一路睇Viu新聞,跟住都有討論疫情,點知世伯無啦啦著咗火,黑晒面咁話:食飯唔好講呢啲!然後轉咗台去睇無線愛回家,仲話自己抵抗力強唔使戴口罩。」

我:「……算啦,都捱過咗啦!」

「係呀,好在我女朋友叻,識去買定啲丸,我而家先知魚皮餃係咁好味㗎!」

我:「冇搵錯女友啦,佢真係好細心。」

「嗯,所以我想多謝你,過兩日出嚟,請你食飯吖。」

我:「哦……唔好喇,呢排拜年呀,遲啲先吖。」

「咁下星期囉!」

我:「哦……公司有幾個event好忙呀,遲啲先吖,我諗要三月先得。」

「你唔係驚我有事傳染你呀?」

我:「唔係,傻啦,點會啫。」

「咁下個星期啦!」

我:「唔係呀,真係忙呀。」

「我買蛋糕上你公司囉!」

我:「唔好喇,唔使啦!」

「你仲唔係驚我傳染你?」

好啦好啦!我認咗佢啦,其實我唔止怕人唔戴口罩,我更加怕人上過大陸,上面而家好毒呀!

error: