話說我有個男會員係做護士，佢喺一次活動中認識咗個女會員，一見鍾情嗰隻，不過我對呢個女會員嘅印象麻麻，因為佢真係比較麻煩，濕濕碎碎嗰啲唔講喇，淨係講一個case，某次我哋公司響應大遊行，取消咗個speed dating活動，呢位女會員打嚟炒蝦拆蟹，當時佢咁樣同我講：「唔係個個都去遊行㗎，點解要取消呢？」
我哋已經接近兩星期前通知晒所有會員，可以退款，可以join下一次活動，個個都讚好，唯獨係呢位女會員咁唔體諒，亦都唔支持我哋因為遊行而取消speed dating活動。
Anyway，鍾意嘅嘢冇得好講，個男護士member真係好鍾意呢個女仔，據我理解，佢哋出過三四次街，不過個女仔次次都有所要求先會出去，例如佢知道阿男護士family trip去新加坡，呢個女仔就約佢出嚟食飯，原來係有嘢想佢拎去新加坡轉交畀朋友。
另外兩三次我唔嘥手力去打喇，因為重點都係最近一次，呢條女竟然想開個page賣口罩。
冇錯，佢打出嚟嘅旗號係幫人，你要質疑佢，某程度上係同全香港人為敵，一定有人質疑你點解有口罩賣都唔幫人仲要批評，又可能有人話你以小人之心度君子之腹，不過我想講，呢條女連遊行都唔支持，仲有一直以嚟嘅所作所為，根本就冇咁好心去幫人。
佢想賣口罩又關個男會員咩事呢？因為個男仔做護士囉，佢打緊呢樣嘢主意，以為人哋係護士就可以任拎口罩，然後個男仔同佢講唔係任攞，醫護人員都要mark數，跟住個女仔嘅態度就180度轉變喇。
本身人哋嘅事我就可以隻眼開隻眼閉，但你燒到我嗰疊就真係扯火，個女仔知道我有個page（係呀，特登打出嚟畀呢條八婆睇），竟然提議喺我個page度賣口罩，仲懶係畀牌我上：「嗱，你一定要啲人like & share先可以買，咁咪win win囉，你又可以增加粉絲。」
我反問佢：「口罩邊度嚟？阿邊個雖然係男護士，但係佢唔可以幫你買到口罩喎！」
「我叫朋友喺外國買。」
我：「即係你根本未有貨？請問如果真係有貨，點交收？」
「未呀，咩都未度㗎！你出咗post先，一有貨通知你，其實多與少對你唔係問題吖，就算我最後得十盒返，你咪話係隨機抽囉，根本冇人知你確實出咗幾多貨。」
我：「即係你想發國難財？」
「你唔使講得咁難聽，我冇諗住發國難財，本身我想開個page，然後叫多啲人like & share，但係儲極都係得百幾個粉絲，如果唔係都唔使搵你幫啦！」
我：「你本身想開個page吸引人like & share，口罩熱潮過咗就run其他嘢，而家搞唔掂就想借我個page過橋，我唔會幫你。」
「得啦，冇嘢，我搵其他人。」
呢個post可能會招嚟好多負評或者攻擊，但實在係不吐不快，一方面不恥呢啲別有用心嘅人，另一方面想同大家講，網上訂口罩要小心啲。其實唔止人血饅頭，有啲人未必係想呃你錢，佢志在用最短時間起一個page出嚟，以口罩去極速增加like & share，建議大家買口罩點心急都好，睇清楚啲page係咪新開，之前出開咩post，係咪賣開嘢，唔好被人利用，仲有，我想同呢位男護士講多句：「你都唔好咁蠢畀條女利用呀！」
如果真係有口罩想幫人，你搵你投票選出嚟嘅區議員，甚至搵渣哥或者龍門冰室幫你派，一定可以更快更直接幫到人，除非你別有用心。