早幾個月去見工，過程其實唔錯，我同個Manager仲有講有笑，去到最後傾多幾句閒計，佢臨尾問咗我一個問題：「你同時間有冇見緊其他工呀？或者有冇offer喺手？」因為氣氛好輕鬆，我亦冇諗太多，照直答對方：「我冇其他工見呀！」
個Manager再問我點解淨係見佢哋公司，咁我就解釋畀佢聽並唔係孤注一擲，只係send咗好多CV出去都冇feedback，係連電話都冇人打嚟嗰隻，當時就係得佢間公司打嚟叫我去interview，我係冇得揀㗎！
返到屋企有同家姐講，家姐話我答得好差：「有冇搞錯呀，傻嘅都知唔會咁答啦，你話send咗好多CV出去都冇回音，淨係得佢一間約你見工，咁咪即係間接認自己無人要囉！」
我：「會唔會諗到咁複雜呀？」
家姐：「咁如果有條仔追你，佢同你講之前追過幾廿個女仔，結果個個都唔受溝，得你一個肯同佢去街，你會唔會覺得呢個男仔條件好差先冇人要吖？冇人要先嚟溝你，如果你又受，係咪代表你要求低過之前嗰幾廿個女仔呀？都唔馨香啦！」
我都未拍過拖，又冇畀男仔追過，點知啫！呢個思路會唔會太陰謀論呢？我都係照直答咋喎！但因為呢次interview過咗一個幾星期都冇回音，我又覺得家姐講嘅嘢好似有少少道理。
後來我仲同咗另一個朋友分享，個friend都話我答得唔好：「你家姐咁講又真係誇張咗啲，不過我都覺得個Manager係試緊你，我之前見過一份工都有畀HR咁樣問。」
我：「咁你點答？」
Friend：「嗰陣我同你一樣都係send咗好多CV出去，但係好你少少，total有兩間公司叫我in，咁我唔想佢拖慢請人嘅進度吖嘛，咪老作話見咗幾份工，有3至4份已經出咗offer囉，然後話自己想揀下先。」
我：「作到咁大？結果佢有冇因為咁而請你呀？」
Friend：「我唔知喎，因為佢哋過咗幾日打返嚟嗌我second in，不過當時另一份真係出咗offer，其實兩份都差唔多，我費事再去second in啦，咪推咗佢囉，我都唔知再in多一round佢會唔會請我㗎！」
聽埋個friend咁樣講，諗多兩諗我又真係覺得自己答錯，唔通要講到自己皇帝女唔憂嫁先係正路？
因為都個幾星期冇回音，心態上我已經覺得自己冇咗呢份工，唯有再積極啲send CV啦！萬萬冇諗到呢個時候竟然收到電話，係嗰間公司打嚟話請我，問我幾時可以返工，唔通呢啲就係傻人有傻福？
呢份工我返咗之後都好開心，啱啱過埋試用期喇，個Manager仲好好人好nice，一啲架子都冇，我見自己都做咗幾個月，咁咪開心見誠問下佢，當時我話自己冇interview冇offer，佢係咪覺得我好廢。
我：「其實我諗過，你哋隔咗個幾星期先搵我，係咪因為有人請完又走咗，結果搵我做replacement？」
Manager：「唔係，因為我一早買咗機票全家旅行，嗰陣老細都唔喺香港，所以先至遲咗搵你之嘛，冇特別，都唔係有人做做下走咗，你唔係replacement，放心。」
我：「因為你問過我一條問題，就係有冇同時見緊其他工，我答你冇，唔止冇offer，連其他interview都冇，後來我見咁耐冇feedback，所以我諗過自己係咪答錯……」
Manager：「冇話啱定錯㗎喎，你都係照答之嘛，同埋其實我咁問，係因為呢個position好jun（佢意思係junior），講真要求唔係咁高，當時我都有問其他candidate，有個話自己已經有幾個offer喺手，另一個答完就話趕時間去見另一份，頭先同你講咗啦，我in完人就去咗旅行，老細又唔喺香港，嗰兩個candidate咁搶手，無謂阻人發達啦，你未有offer又冇其他工見吖嘛，咪執你返嚟囉！」
我：「講真㗎？」
Manager：「呃你做咩啫，不過我對你印象係唔錯嘅，否則都唔會請你，畀心機做啦！」
其實send咗咁多CV出去都冇回音，我真係有懷疑過自己，信心亦跌到落谷底，個人認為interview技巧係需要嘅，但每個公司、每個HR、每個department head諗嘅嘢都唔同，有時你萬事俱備對答如流，對方如果睇你唔順眼都冇辦法，又有啲人正正係鍾意你答問題夠真同埋冇舖排，所以多多少少都係睇運氣同眼緣。
好多人同我一樣，都經歷過，或者經歷緊send海量CV出去都冇feedback，但唔好懷疑自己，亦唔使搞到自我形象咁低落，平常心就得喇，有啲嘢你做得再好，都總有人會挑骨頭，有時你表現麻麻，又會有人識得喺另一個角度欣賞你，希望用呢個平平無奇嘅見工真實故事，鼓勵搵緊工嘅朋友仔唔好氣餒。（完）
送上兩個關於interview嘅短故事：
優先考慮嗰啲優先考慮你嘅人
https://hkofficedaily.com/?p=10465
肯學肯做都有錯？
https://hkofficedaily.com/?p=10718